Ministri i Punëve të Brendshme, Besfort Lamallari, reagoi pas dhunimit të një protestuesi në Zvërnec nga një roje private sigurie, duke vënë theksin te dy elemente të papranueshme: sjellja e rojes dhe indiferenca e policisë së pranishme. Ai nënvizoi se projekti i Zvërnecit lidhet me një tokë tërësisht private, për të cilën qeveria nuk ka dhënë asnjë herë tokë; pronësia i është kthyer pronarëve dhe është regjistruar në hipotekë para ardhjes së kësaj qeverie.
Lamallari thekoi se, edhe pse prona është private, rojet private nuk kanë të drejtë të përdorin forcë ndaj askujt. Si individë, tha ai, duhet të ndiqen penalisht dhe po ndiqen, ndërsa për kompaninë e tyre duhet të kryhet hetim administrativ për paaftësi të plotë në ushtrimin e aktivitetit të autorizuar dhe të mbyllet sa më parë të jetë e mundur. Ai përshëndeti reagimin e shpejtë të Drejtorisë së Përgjithshme të Policisë së Shtetit për pezullimin e drejtuesve vendorë dhe vënien nën hetim të zinxhirit të komandimit, duke ripërsëritur se nuk ishte e pranueshme vetëm sjellja skandaloze e rojeve, por edhe indiferenca e policisë së pranishme.
Ministri njoftoi se goditja brenda radhëve të Policisë së Shtetit, e cila nisi në Sarandë dhe vazhdoi në Vlorë, do të jetë një konstante e punës së strukturave nën drejtimin e ri. Ai sqaroi se uniformat e policisë duhet të jenë gjithmonë garant i rendit ligjor, me mbrojtjen e pronës publike dhe private si pjesë thelbësore të detyrës së tyre, por edhe garant i pacënueshmërisë së besimit të qytetarëve tek policia. Çdo devijim nga këto parime, shtoi Lamallari, do të goditet përmes bashkëpunimit të ngushtë midis strukturave drejtuese të policisë dhe Agjencisë së Mbikqyrjes Policore.
