Shekspiri rikthehet në Teatrin Kombëtar me Otellon, një nga tragjeditë më të fuqishme ku xhelozia dhe manipulimi ndërthuren në mënyrë dramatike. Protagonist i veprës është Otello, interpretuar nga Arben Derhemi, një gjeneral me origjinë maure në ushtrinë veneciane, i cili martohet fshehurazi me Dezdemonën, në rolin e së cilës vjen Linda Jarani. Konflikti përshkaktohet nga oficeri Jago, i cili, i mbërthyer nga mllefi se nuk u ngrit në detyrë, hakmerret duke e manipuluar Otellon dhe duke e bindur se bashkëshortja po e tradhton me Kasjon.
Arben Derhemi shpjegon motivet e Jagos: “Ai baltoset për motivin e vetëm sepse ndjen veten jashtë gjithçkaje, i prozvalur nga shoqëria, që në momente të caktuara jo vetëm nuk të kupton, por të fut nën rrogoz gjëra të tjera që ti as i ke menduar ndonjëherë, as i ke parë ndonjëherë.” Aktori Lulzim Zeqja e përshkruan Jagon si të shkuar “në sëmundje, në psikopati”, duke shprehur habinë për thellësinë e së keqes që ai arrin të paraqesë.
Personazhet e Shekspirit paraqiten si të pakohë, duke treguar se si xhelozia dhe manipulimi mund të shkatërrojnë arsyen dhe jetën e njeriut. Aktori Donald Shehu lidh temat e vepres me realitetin bashkëkohor: “Situatat në të cilat gjenden personazhet, janë situata që i hasim shumë sot në marrëdhëniet në familje, në shoqëri… Është ai krimbi i dyshimit që rëndon te ne. edhe tema e të huajt, ne sot presim nqë të na i zgjidhin të huajt problemet.”
Nën regjinë e Qëndrim Rijanit, shfaqja ka një koncept postmodern dhe nis me një kakofoni urbane ku e tashmja përzjehet me të shkuarën. Rijani e përshkruan shfaqjen si “një udhëtim në kohë sikurse udhëton vepra me kanonizimin e saj, me ‘traditat’ negative që na kanë mbetur që nga koha e kanibalëve, sikurse thotë Otello në monologun e parë.” Regjisori hulumton gjithashtu se si ndjesia e të qenit i ndryshëm shndërrohet në strumbullarin që tërheq krimin, dyshimin dhe makabritetin, dhe shtron një koncept korridoresh, duke vënë në dukje se vepra zhvillohet kryesisht në korridoret e Pallatit të Otellos.
Shfaqja e Otellos do të sjellë publikun në Teatrin Kombëtar nga 14 deri më 23 maj.
