Xhuljana Muçaj, nënë e tre fëmijëve nga fshati Osoj i Skraparit, është zhvendosur në Tiranë bashkë me familjen për t’u afruar me shërbimet shëndetësore dhe jeton prej muajsh mes dhimbjes, sakrificës dhe shprese. Ajo kujdeset vetëm për dy djemtë e saj të sëmurë: djali 20-vjeç vuan nga autizmi dhe probleme neurologjike, ndërsa djali 15-vjeç është i paralizuar dhe ka probleme të shëndetit mendor që shpesh e bëjnë agresiv. Nëna thotë se, edhe pse u jep ilaçet rregullisht, kur bëhet agresiv djali “të kafshon dhe të shkul flokët”. Përveç tyre, Xhuljana kujdeset edhe për vajzën 4-vjeçare dhe për vjehrrën 78-vjeçare.
Familja prej gjashtë anëtarësh jeton me qira në Tiranë. Të ardhurat nga KEMP-i i dy djemve nuk mjaftojnë për të mbuluar shpenzimet e përditshme si ilaçet, pelenat, ushqimet, detergjentët, energjinë elektrike dhe qiranë. Bashkëshorti punon me ditë dhe me orar të kufizuar, sepse shpesh duhet të jetë pranë familjes për të ndihmuar në momentet më të vështira. Xhuljana nuk mund të punojë pasi djemtë kërkojnë kujdes të vazhdueshëm dhe nuk mund të lihen vetëm; çdo ditë ajo mban në krahë djalin që nuk ecën dhe përballet me gjendjen e rënduar të djalit tjetër, duke u ndjerë “e lidhur këmbë e duar”.
Dëshira më e madhe e saj është të ketë një banesë të sigurt për fëmijët, për t’u ndalur nga ndryshimi i vazhdueshëm i shtëpive me qira dhe për të përballuar më lehtë shpenzimet e jetesës. Pas evidentimit të rastit nga emisioni “Fiks Fare”, Fondacioni Firdeus reagoi duke ofruar mbulimin e pagesës së qirasë për një vit dhe furnizim me ushqime për familjen; përfaqësuesi i fondacionit, Ilir Hoxholli, premtoi se rasti do të mbahet në vëmendje edhe në vijim. Mes emocionesh dhe lotësh, Xhuljana falenderoi “Fiks Fare” dhe Fondacionin Firdeus, duke theksuar se çdo mbështetje për familjen e saj është jetike.
