Pas rreth tre orësh tubimi para Kryeministrisë, protestuesit nisën marshimin në rrugët e kryeqytetit, duke brohoritur për “dorëheqje” të qeverisë dhe “opozita jemi ne”. Më pas ata u rikthyen sërish para kryeministrisë duke thirrur në kor “Nesër më shumë”. Një pjesë tjetër e demonstruesve vijoi marshimin në akse të ndryshme të Tiranës, ndërsa vazhdueshin thirrjet “Rama n’burg, Berisha n’burg” dhe “nesër më shumë”.
Kjo është dita e dhjetë radhazi e protestës qytetare, e nisur si kundërshtim ndaj investimit dhe projektit që pritet të ndërtohet në Zvërnec. Fjalimi hapës sot u mbajt nga aktivisti Alben Kola, i cili u shpreh ndër të tjera: “Është me rëndësi të keni durim, edhe pse kjo betejë do zgjasë disa ditë. Në mërgatën tonë po organizohen chartera. Kemi shumë që kanë ardhur nga Gjermani etj…Organizatorë janë 100 mijë shqiptarët këtu dhe 6 milionë në diasporë. Mos thoni Rama ik se është e opozitës së shitur, thoni Rama burg, Berisha burg. Kush do udhëheqë Shqipërinë e re? Mos kini frikë, kemi 1000 pedagogë jashtë që janë gati të kthehen”.
Një prej protestuesve që mbajti fjalën në podiumin para Kryeministrisë bëri thirrje për zgjerim të mobilizimit: “Nesër do të jetë protestë kombëtare, ju bëj thirrje të vini të gjithë në Tiranë”. Gjatë tubimit u përsëritën kërkesat dhe slogane të njëjta me ditët e mëparshme, ndërsa organizatorët apeluan për vijim të pjesëmarrjes.
Protestuesit kanë parashtruar pesë kërkesa kryesore: dorëheqjen e qeverisë; shfuqizimin e statusit dhe kuadrit ligjor për investitorët strategjikë; shfuqizimin e Paketës së Maleve; anulimin e ndryshimeve në Ligjin për Zonat e Mbrojtura; dhe anulimin e ndryshimeve në Ligjin për Trashëgiminë Kulturore. Demonstratat vazhduan me marshime dhe tubime para godinave qeveritare, duke mbajtur tonin e kundërshtimit ndaj projektit të Zvërnecit dhe kërkesave të paraqitura.
