21 qytetarë të arrestuar gjatë protestës së të enjtes para Kuvendit u paraqitën sot në orën 09:30 para Gjykatës së Tiranës, ku po zhvillohet seanca për vlerësimin e ligjshmërisë së arrestimeve. Grupi Koordinues dhe protestuesit njoftuan më parë se do të mblidhen para gjykatës për të mbështetur të arrestuarit, ndërsa qytetarët kërkojnë lirimin e tyre.
Arrestimet shkaktuan tensione edhe gjatë protestës së djeshme në Tiranë. Pas përfundimit të marshimit, një grup protestuesish u përplas me forcat e policisë pranë Komisariatit nr. 3 në rrugën “Mine Peza”, ku mbaheshin të ndaluarit. Gjatë incidenteve u dëmtuan xhamat dhe dera hyrëse e komisariatit, dhe disa persona depërtuan në ambientet e pritjes.
Të arrestuarit përballen me akuza që përfshijnë shkatërrim prone, kundërshtim dhe goditje të punonjësve të policisë për shkak të detyrës, prishje të rendit dhe qetësisë publike, organizim dhe pjesëmarrje në grumbullime të paligjshme, mosbindje ndaj urdhrit të policisë dhe pengim të qarkullimit rrugor.
Seanca në Gjykatën e Tiranës po zhvillohet ndërsa mbështetës të të ndaluarve janë mbledhur jashtë godinës për të kërkuar lirimin e tyre. Top Channel.
