Një zjarre i madh ka përfshirë që nga mbrëmja e së shtunës një zonë të gjerë në lagjen periferike Oreokastro të Selanikut, duke shkaktuar evakuimin e dhjetëra banesave dhe një situatë kritike për banorët. Flakët shpërthyen rreth orës 20:30 në një zonë agro-pyjore dhe u përhapën me shpejtësi për shkak të erërave të forta, ndërsa zjarrfikësit luftojnë gjatë gjithë natës për të ndaluar përhapjen drejt zonave të banuara.
Autoritetet raportohet se po përballen me dy fronte kryesore zjarri dhe disa vatra të shpërndara që kërcënojnë banesa, biznese dhe objekte industriale. Në rajon ndodhen magazina, punishtet dhe fabrika që ruajnë materiale shumë të lehta ndaj djegies; gjatë natës dëgjuan edhe shpërthime, ndërsa një fabrikë së bashku me magazinat e saj u përfshi plotësisht nga flakët. Ndërtesa të tjera kanë pësuar dëmtime të pjesshme, dhe retë e tymit u përhapën mbi Selanik.
Zjarri u favorizua nga erërat veriore me forcë deri në 6 ballë, të cilat ndryshonin vazhdimisht drejtimin, duke komplikuar punën e ekipeve zjarrfikëse. E shtuna ishte deklaruar ditë me rrezik shumë të lartë për zjarre në disa pjesë të vendit, me mbi 60 vatra të regjistruara.
Në terren po punojnë mbi 120 zjarrfikës, 5 grupe këmbësore speciale, 38 automjete zjarrfikëse, autobote dhe makineri të Rajonit të Maqedonisë Qendrore, si dhe vullnetarë të shumtë. Një avion zjarrfikës mori pjesë në operacion deri në perëndimin e diellit; mjetet ajrore u tërhoqën me rënien e natës. Në orën 20:52 autoritetet dërguan një mesazh emergjent përmes numrit 112, duke kërkuar evakuimin e banorëve të Anthoupolit. Një rast i rëndësishëm ishte evakuimi i 157 personave nga Institucioni i Sëmundjeve Kronike “Shën Panteleimoni” në Derveni, pranë autostradës Egnatia, përballë fabrikës “Titan”.
Më vonë zjarri po lëvizte drejt jugut, në drejtim të lagjes Evkarpia. Kryetari i bashkisë Pavlou Melas, Dimitris Aslanidis, e përshkroi situatën si dramatike. Në vend të ngjarjes mbërriti edhe Njësia Hetimore për Krimet e Zjarrvënies; si pjesë e hetimeve është shoqëruar një 76-vjeçar.
