Finalja e Ligës së Kampioneve do të zhvillohet të shtunën, më 30 maj, në orën 18:00 në Budapest, ku përballen Paris Saint-Germain dhe Arsenal. Pyetja kryesore që shtron ndeshja është nëse parizienët do të fitojnë trofeun për të dytin vit radhazi apo nëse Arsenal do të marrë titullin e parë evropian dhe të realizojë një dopietë trofesh pas suksesit në Premier League.
Trajneri i Paris Saint-Germain mund të ketë arsye për optimizëm, pasi skuadra rekuperon dy lojtarët kyç Ousmane Dembele dhe Achraf Hakimi, të cilët kanë qenë elementë të rëndësishëm në ecurinë evropiane nën drejtimin e Luis Enrique. Dembele pësoi një dëmtim në pulpë në ndeshjen e fundit të kampionatit, ndërsa Hakimi ndoqi një program intensiv rikuperimi pas një dëmtimi në kofshë që pësoi në ndeshjen e parë të gjysmëfinales kundër Bayernit të Mynihut.
Në ditët e fundit, Hakimi kreu stërvitje individuale, dhe së fundmi të dy lojtarët nisën të stërviteshin së bashku me grupin. Përpara nisjes për në Budapest, paraditen e së premtes mjekët e Paris Saint-Germain do të kryejnë kontrollet e nevojshme për të konfirmuar gjendjen e tyre, ndërsa te kampionët e Francës mbizotëron optimizmi për pjesëmarrjen e dy futbollistëve në finalen e 30 majit.
Ndeshja pritet të vendosë mes dy skuadrave fatin e trofeut më të rëndësishëm evropian për klube, me Paris Saint-Germain si kampionët në fuqi të Evropës dhe Arsenal në kërkim të titullit të parë kontinental. (Burimi: Top Channel)
