Shoqata e Futbollistëve Profesionistë në Spanjë (AFE) po planifikon një reagim të organizuar për ndeshjen midis Barcelonës dhe Villarrealit, e cila është caktuar për më 20 dhjetor 2025 në stadiumin Hard Rock të Miamit. Burime nga COPE raportojnë se lojtarët po shqyrtojnë mundësinë e një proteste simbolike gjatë ndeshjeve të javës së nëntë të LaLigas, ku do të ndalen për 20 deri në 30 sekonda në fillim të takimit. Ky veprim do të shërbejë si një mesazh kundër asaj që ata e quajnë mungesë transparence dhe respekti nga ana e LaLigas.
Takimi hapës i javës së nëntë, Oviedo – Espanyol, planifikohet të luhet sonte në stadiumin “Carlos Tartiere” dhe mund të jetë pika e parë e kësaj proteste. Megjithatë, nuk është e konfirmuar nëse do të ketë ndalim, pasi AFE vazhdon diskutimet me kapitenët dhe dhomat e zhveshjes të të gjitha ekipeve.
AFE ka nxjerrë një deklaratë zyrtare, duke shprehur pakënaqësinë e saj për vendimin e LaLigas për realizimin e ndeshjes në SHBA pa konsultuar lojtarët: “Nuk kemi marrë asnjë informacion lidhur me këtë ndeshje, edhe pse e kemi kërkuar që dy muaj më parë, që nga momenti kur Bordi i Drejtorëve i Federatës Spanjolle e konfirmoi projektin.”
Shoqata thekson se kjo nuk është hera e parë që LaLiga vepron në mënyrë të tillë. Në vitin 2018, një përpjekje për të zhvilluar një ndeshje zyrtare jashtë Spanjës dështoi, pas kundërshtimit të AFE-së.
Protesta e paralajmëruar vjen në një moment të vështirë për marrëdhëniet mes LaLigas dhe përfaqësuesve të lojtarëve, me tensione që kanë lindur për çështje të drejtat e lojtarëve dhe transparencën institucionale. Mbetet për t’u parë nëse do të realizohet pushimi simbolik dhe çfarë impakti do të ketë në marrëdhëniet mes palëve dhe në debatin mbi zhvillimin e ndeshjeve jashtë territorit të vendit.
