Të premten, më 17 prill, do të zhvillohet protesta e radhës kombëtare e Partisë Demokratike përpara godinës së Kryeministrisë. Policia e Tiranës ka njoftuar masat që do të aplikohen dhe rrugët që do të bllokohen në kryeqytet për garantimin e mbarëvajtjes së tubimit.
Sipas njoftimit zyrtar, përfaqësues të Partisë Demokratike kanë informuar Policinë e Tiranës për zhvillimin e tubimit më datë 17.04.2026, nga ora 19:00 deri në orën 22:00, në bulevardin “Dëshmorët e Kombit”, para godinës së Kryeministrisë. Në bazë të ligjit “Për tubimet”, Policia e Tiranës ka marrë masa për të garantuar zhvillimin në vendin dhe afatin kohor të kërkuar.
Në zbatim të masave të vendosura, do të kufizohet lëvizja dhe do të ndalohen parkimet në disa segmente rrugore. Nga ora 23:45 e datës 16.04.2026 deri në përfundim të tubimit, do të bllokohet lëvizja dhe nuk do të lejohet parkimi i automjeteve në bulevardin “Dëshmorët e Kombit”, nga vendi i quajtur “Ura e Dajtit” deri në rrugën “Ismail Qemali”. Po ashtu, nga ora 15:00 e datës 17.04.2026 deri në përfundim të tubimit, do të ketë bllokim të lëvizjes së automjeteve në bulevardin “Dëshmorët e Kombit”, nga kryqëzimi afër Ministrisë së Brendshme deri te sheshi “Nënë Tereza”. Bashkë me këtë, do të bllokohen rrugët “Ukraina e Lirë”, “Papa Gjon Pali II” dhe “Ismail Qemali” gjatë periudhës së përcaktuar.
Policia e Tiranës apelon tek organizatorët e tubimit që të respektojnë afatin kohor dhe vendin ku do të zhvillohet tubimi. Po ashtu kërkon mirëkuptimin e qytetarëve për kufizimin e lëvizjes me automjete gjatë periudhave të përcaktuara. Në njoftim theksohet gjithashtu apeli që qytetarët të distancohen në rast se gjenden përballë veprimeve të kundërligjshme që cenojnë rendin dhe sigurinë publike.
Top Channel
