Kryeministri Edi Rama nisi vizitën e tij të punës në Romë, Itali, ku u prit me ceremoni zyrtare në Pallatin Chigi nga Kryeministrja e Republikës së Italisë, Giorgia Meloni. Pas pritjes ceremoniale, Rama zhvilloi një takim kokë më kokë me Meloni, i cili u fokusua në ecurinë e bashkëpunimit mes dy vendeve, thellimin e marrëdhënieve bilaterale si dhe në çështjet me interes të përbashkët rajonal dhe europian.
Vizita e kryeministrit në Romë dhe më pas në Barcelonë zhvillohet në kuadër të angazhimeve ndërkombëtare dhe të përpjekjeve për forcimin e bashkëpunimit me partnerët evropianë. Zyra e Kryeministrisë njofton se gjatë qëndrimit në Itali, pas takimit me kryeministren Meloni, Rama do të takohet edhe me Ministrin e Mbrojtjes së Italisë, Guido Crosetto, në vijim të axhendës së përcaktuar për këtë vizitë.
Më pas, me ftesë të kryeministrit të Spanjës, Pedro Sanchez, Kryeministri Rama do të marrë pjesë në punimet e mbledhjes së katërt të Samitit “Në Mbrojtje të Demokracisë”, që zhvillohet në Barcelonë. Programi i samitit do të përqendrohet në tema kyçe, ndër të cilat “Institucionet dhe multilaterizmi” si dhe “Dezinformimi dhe teknologjia digjitale”. Në kuadër të këtyre temave, punimet pritet t’i kushtojnë vëmendje të veçantë rregullimit të mjedisit dixhital me qëllim luftimin e dezinformimit, forcimit të institucioneve demokratike dhe multilateralizmit, si dhe adresimit të pabarazive, të cilat përmenden si themel për një demokraci të fortë.
Gjatë Samitit të zhvilluar në Barcelonë, kryeministri Rama do të zhvillojë gjithashtu takime dypalëshe, përfshirë biseda me kryeministrin Pedro Sanchez dhe me Presidentin e Këshillit Evropian, António Costa, sipas njoftimeve të zyrës së tij. Artikulli origjinal është publikuar nga Top Channel.
