Protestat e sotme nisën me deputetë dhe militantë të Partisë Demokratike që u mblodhën para selisë së PD dhe marshuan drejt Kryeministrisë. Paralelisht, rreth orës 14:00 nisi protesta e të rinjve në Rrugën e Durrësit, ku protestuesit hodhën gurë drejt mistrisë së Arsimit dhe efektivëve që kishin vendosur kordone në atë aks. Disa koshë zjarri iu afruan policisë dhe u vendosën flakë; forcat e rendit u kundërpërgjigjën me autobotë ujëhedhës, gaz lotsjellës dhe ujë, duke e boshatisur brenda minutash Rrugën e Durrësit.
Të shpërndarë në grupe, protestuesit shkëmbyen përplasje me policinë në Sheshin Skënderbej dhe më pas u rigrupuan në Bulevardin “Dëshmorët e Kombit”, pranë Kryeministrisë, ku u zhvillua një nga përplasjet më të forta që prej 13 tetorit, kur nisi protesta e dhunshme. Në vijën e parë ishin të rinj të organizuar si grupi më aktiv, që hodhën molotov ndaj forcave të rendit. Policia, e angazhuar me rreth 2,000 efektivë, përdori autobotët, plumba gome, sprej piperi dhe gaz lotsjellës në masë për t’i zprapsur.
Protestuesit u shpërndanë në zona të ndryshme të kryeqytetit, duke krijuar fronte të shumta ku herë përparonin ata e herë avanconte policia. Një nga dyert e Mistrisë së Bujqësisë u përfshi nga flakët dhe më pas u shua nga zjarrfikësit. Në rrugën e Myslym Shyrit shërbimet dhe bizneset u gjetën të papërgatitura kur policia marshoi në ndjekje të protestuesve, por aty nuk raportohen incidente të rënda.
Beteja vijoi gjatë pasdites sidomos në Sheshin Skënderbej, ku të rinj të maskuar e me shkopinj u përplasën me policinë, ndërsa tymueset e përdorura nga forcat e rendit u kthyen në një shkëmbim mes palëve. Një protestues dhe një efektiv u përfshinë nga flakët dhe morën ndihmë menjëherë. Në spital u paraqitën për ndihmë një deputet, katër protestues, një polic dhe dy përfaqësues të medias. Në protestë morën pjesë përveç të rinjve dhe studentëve edhe pedagogë, mjekë, sindikata e biznesit të vogël, Sindikata e Pavarur e Artit, Kulturës dhe Medias, si dhe demokratë që në mëngjes zhvilluan një tubim paqësor pranë Kryeministrisë; i vetmi incident aty ishte djegia e shilteve të vendosura nga kryeministri.
