Gjendja e korrupsionit në Shqipëri është përkeqësuar. Sipas Transparency International vendi ka rënë me një pikë në krahasim me vitin 2020.
Raporti i publikuar të martën tregonte se 86 për qind e 180 vendeve kanë bërë pak ose aspak përparim në luftën kundër korrupsionit në 10 vitet e fundit.
Kosova është përmirësuar me tre pikë nga viti i kaluar (39 nga 36). Maqedonia e Veriut është përmirësuar gjithashtu me 4 pikë (39 nga 35).
Danimarka, Finlanda dhe Zelanda e Re janë kampionët në luftën kundër korrupsionit sipas raportit të TI. Ato shënojnë 88 nga 100 pikë të mundshme.
Somalia, Siria dhe Sudani i Jugut kanë gjendjen më të keqe të korrupsionit.
Sa i takon nivelit të demokracisë, Shqipëria rezulton me probleme. Sipas raportit gazetarët përballen me kërcënime, ndërsa liria për të protestuar shkelet nga dhuna e policisë.
Lidija Prokic, këshilltare rajonale për Evropën Lindore dhe Juglindore thotë se “janë vënë re disa reagime të gabuara nga forcat e rendit kur bëhet fjalë për protesta publike”. Sipas saj pandemia u përdor për të justifikuar mungesën e llogaridhënies dhe si rrjedhojë shtimin e korrupsionit.
“Ka pasur përpjekje për të miratuar ligje që frenojnë seriozisht lirinë e shprehjes. Dhe këto mund të mos duken direkt të lidhura me anti-korrupsionin, por në të vërtetë janë. Që mekanizmat kundër korrupsionit të funksionojnë mirë, që vendet të kenë sukses në luftën ndaj korrupsionit, ato kanë nevojë për media të lirë, kanë nevojë për shoqëri të lirë civile,” – deklaroi Prokic për VOA.
Sipas saj nuk mund të jemi optimistë për Shqipërinë sepse nga 10 vjet më parë kur rezultati ishte 33 pikë, rritja me 2 pikë nuk përbën përparim.
