Polonia shprehu habi pas vendimit të shefit të Pentagonit, Pete Hegseth, për të anuluar vendosjen e planifikuar të 4,000 trupave amerikane në vend. Qeveria polake theksoi se hapi nuk paraqet rrezik të menjëhershëm për sigurinë kombëtare dhe se bashkëpunimi me Shtetet e Bashkuara mbetet i fortë.
Ministri i Mbrojtjes, Władysław Kosiniak-Kamysz, deklaroi se aleanca polako-amerikane është “e qëndrueshme dhe e fortë” dhe se Polonia vazhdon të jetë “aleati më i besueshëm i SHBA-së në Evropë”. Sipas tij, Varshava është në kontakt të vazhdueshëm me palën amerikane dhe ka marrë garanci se nuk ka plan për ulje sistematike të pranisë ushtarake amerikane në vend. Zëvendësministri i Mbrojtjes, Paweł Zalewski, po ashtu tha se autoritetet amerikane kanë siguruar se nuk synohet reduktim i pranisë së trupave në Poloni dhe se vendi mbetet partner kyç i NATO-s.
Megjithatë, vendimi ka shkaktuar shqetësim në Varshavë, pasi njësia e planifikuar për dislokim kishte nisur tashmë përgatitjet për transferim në Evropë. Pentagoni deklaroi se vendimi nuk ishte i papritur dhe as i marrë në moment të fundit. Në Poloni, mundësia e tërheqjes vlerësohet me vëmendje të shtuar për shkak të shqetësimeve të sigurisë nga Rusia.
Autoritetet polake theksuan se, edhe pse Polonia shpenzon një nga përqindjet më të larta të PBB-së për mbrojtje në NATO, prania e trupave amerikane konsiderohet thelbësore për sigurinë kombëtare. Aktualisht rreth 500 trupa amerikane janë të stacionuara përgjithmonë në vend, ndërsa deri në 10,000 të tjerë lëvizin me rotacion. Qeveria bëri të ditur se nuk ka ulje të numrit të përgjithshëm të forcave amerikane dhe se po punohet për forcimin e mëtejshëm të bashkëpunimit ushtarak.
Analistët paralajmërojnë se vendime të papritura në lidhje me dislokimin e trupave mund të krijojnë pasiguri mes aleatëve evropianë dhe të ndikojnë në besueshmërinë e SHBA-së në rajon. Top Channel.
