Grupi Parlamentar i Partisë Demokratike ka dorëzuar në Kuvend amendamente lidhur me procesin e anëtarësimit të Shqipërisë në Bashkimin Europian, duke kërkuar kontroll parlamentar mbi qeverinë dhe ndarjen e shtetit nga partia në pushtet.
1. Të ushtrojë në mënyrë të plotë dhe efikase funksionin ligjbërës dhe mbikqyrës për procesin e integrimit europian, duke garantuar cilësinë e legjislacionit, përafrimin me acquis communautaire dhe zbatimin e tij në praktikë.
2. Të forcojë kontrollin parlamentar mbi ekzekutivin, veçanërisht lidhur me financat publike, prokurimet, koncesionet, fondet e BE-së dhe përdorimin e burimeve shtetërore, duke rritur transparencën, auditimin e pavarur dhe llogaridhënien.
3. Të sigurojë pjesëmarrje të plotë të opozitës në veprimtarinë parlamentare dhe të respektojë kërkesat e saj në përputhje me standardet demokratike, Kushtetutën dhe Rregulloren e Kuvendit, si garanci për funksionimin real të pluralizmit politik dhe përmirësimin e klimës së dialogut.
4. Të kërkojë zbatim të plotë të rekomandimeve të OSBE/ODIHR dhe Komisionit të Venecias për garantimin e zgjedhjeve të lira e të ndershme dhe ndarjen e shtetit nga partia.
5. Të sigurojë respektim të detyrueshëm të vendimeve të Gjykatës Kushtetuese dhe të institucioneve të pavarura, si themel i shtetit të së drejtës dhe kusht për progres në negociatat me BE-në.
6. Të kërkojë forcim të rezultateve konkrete në luftën kundër korrupsionit të nivelit të lartë dhe krimit të organizuar, duke garantuar mbështetje të plotë për institucionet përkatëse dhe zbatimin e rekomandimeve të BE-së.
7. Të përmirësojë mekanizmat e mbrojtjes së gazetarisë së lirë, transparencës së pronësisë së medias dhe pavarësisë editoriale, duke garantuar një mjedis mediatik konkurrues dhe të paanshëm.
8. Të angazhohet në luftën kundër dezinformimit dhe ndërhyrjeve të huaja për mbrojtjen e integritetit të proceseve demokratike dhe interesave strategjike kombëtare.
9. Të nxisë dialog politik dhe shoqëror gjithëpërfshirës për të siguruar konsensus kombëtar mbi prioritetet europiane.
10. Të forcojë partneritetin ndërparlamentar me Parlamentin Europian dhe parlamentet e vendeve anëtare të BE-së, duke kontribuar në diplomacinë parlamentare dhe marrëdhëniet me parlamentet homologe.
11. Të refuzojë çdo nismë, akt apo veprim që devijon nga kursi i qenësishëm i anëtarësimit të plotë të Shqipërisë në Bashkimin Europian.
