Flakët në rrethinat e kryeqytetit shtynë Bashkinë e Tiranës të hapë tender për blerjen e një automjeti zjarrfikës për të gjitha terrenet. Tenderi u hap këtë të premte dhe parashikon një fond limit mbi kufirin e lartë monetar, deri në 29 milion lek, e barazvlefshme me rreth 312 mijë euro sipas kursit zyrtar të Bankës. Financimi do të vijë nga buxheti i bashkisë për vitin 2026. Afati për dorëzimin e dokumentacionit është një muaj nga data e njoftimit, ndërsa thirrja përfshin specifikime teknike të detajuara.
Kërkesa kryesore është që mjeti të jetë i ri, i papërdorur dhe të ketë qenë i prodhuar në një nga vendet e Bashkimit Europian. Automjeti duhet të jetë ngjyrë e kuqe, i pajisur me fenelina, dhe të ketë të paktën gjashtë vende. Kapaciteti i depozitës së ujit kërkohet minimalisht 4,000 litra, dhe mjeti duhet të ketë një pompë me presion të lartë. Mes pajisjeve të tjera të kërkuara përmenden një litar shpëtimi 30 metra i gjatë, një set ndihme të parë, si dhe pajisje shpëtimi të kombinuara elektro-hidraulike.
Garancia për automjetin duhet të jetë tre vjet ose deri në 100,000 km dhe përfshin shërbimet periodike. Përzgjedhja e fituesit do të ndikohen edhe nga kriteret ekonomike dhe të eksperiencës së operatorëve ekonomikë. Përveç faktit që oferta me vlerën më të ulët mund të kualifikohet, operatori duhet të ketë eksperiencë në kontrata të ngjashme dhe të vërtetojë qëndrueshmëri financiare duke dorëzuar bilancet e tre viteve të fundit. Gjithashtu kërkohet që operatori të ketë të paktën 50 punonjës.
Tenderi detajon edhe kërkesa për stafin dhe infrastrukturën e kompanive pjesëmarrëse: është e domosdoshme të ketë personel inxhinierik, si inxhinier mekanik, xhenerik ose elektro-auto. Kompania duhet të disponojë një servis, në pronësi ose me qira, me sipërfaqe jo më të vogël se 500 m² brenda territorit të Bashkisë Tiranë.
