Pas deklaratave të presidentit Trump se bisedimet e reja me Iranin do të fillonin të hënën dhe anulimit të asaj që ai përmendi si sulme masive, çmimet e karburanteve në tregjet ndërkombëtare nisën të bien lehtësisht. Investitorët reagojnë pozitivisht ndaj sinjaleve për një marrëveshje midis Shteteve të Bashkuara dhe Iranit, ndërsa pritshmëritë për ulje të tensioneve në Lindjen e Mesme dhe për rihapjen e plotë të Ngushticës së Hormuzit po rrisin besimin se furnizimi global me naftë do të normalizohet.
Nafta Brent ka zbritur nën 78 dollarë për fuçi, ndërsa nafta amerikane WTI po tregtohet rreth 79 dollarë për fuçi. Analistët vlerësojnë se tregjet po parashikojnë rikthimin e eksporteve iraniane dhe një ofertë më të lartë në tregun ndërkombëtar, faktorë që ushtrojnë presion për uljen e çmimeve. Megjithatë, ata paralajmërojnë se paqëndrueshmëria nuk ka marrë fund: mungesa e detajeve mbi zbatimin e një marrëveshjeje dhe zhvillimet në Ngushticën e Hormuzit mund të vazhdojnë të shkaktojnë luhatje në ditët në vijim.
Për Shqipërinë, një ulje e qëndrueshme e çmimeve të naftës në tregjet ndërkombëtare mund të krijojë hapësira për rënie të kostove të importit të karburanteve. Por ndikimi në nivelin e çmimeve në pikat e shitjes nuk është i menjëhershëm, pasi varet nga stoqet ekzistuese, kostot e transportit dhe mënyra e furnizimit të kompanive importuese. Aktualisht, nafta po tregtohet për 214 lekë për litër, ndërsa benzina për 199 lekë për litër.
Në këtë situatë, konfindustria kërkon ndërhyrjen e qeverisë në katër drejtime: ulje me 15% të taksave mbi karburantet, ringritjen e bordit të transparencës, ndërhyrje për cilësinë dhe kontrolle kundër naftës së kontrabanduar.
