Kryeministrja e Danimarkës, Mette Frederiksen, reagoi pas një mesazhi të marrë nga një kirurg plastik që i sugjeronte të “rregullonte” një shenjë të vogël në hundë. Frederiksen, 48 vjeçe, publikoi në Instagram një pamje të bisedës dhe iu përgjigj drejtpërdrejt mjekut: “Oh no. Jam e lumtur me trupin tim”.
Ajo tha se nuk është hera e parë që përballet me komente për pamjen e saj, duke përmendur mesazhe lidhur me dhëmbët, flokët dhe një shenjë në hundë, si dhe sugjerime për përdorimin e Botox-it. “Kam humbur numërimin se sa mesazhe kam marrë gjatë viteve në lidhje me pamjen time”, shkroi Frederiksen, duke ilustruar frekuencën e vërejtjeve që merr si figurë publike.
Kryeministrja theksoi se është plotësisht e kënaqur me trupin e saj dhe se të qenit një grua në jetën publike shpesh nënkupton përballjen me komente dhe kritika për pamjen. “Jam absolutisht mirë me trupin tim, siç është kur je një grua që i afrohet të 50-ave”, u shpreh ajo, duke refuzuar nevojën për ndërhyrje kozmetike të sugjeruara nga të tjerë.
Frederiksen pohoi se i është gjithmonë e hapur për komunikim me qytetarët për çështje të ndryshme, por kërkoi që diskutimet t’u drejtohen temave më të rëndësishme sesa pamja e saj. Ajo iu drejtua edhe autorëve të mesazheve personale me një apel: “Nëse do të më shkruash, dhe je më se i mirëpritur ta bësh, shpresoj se do ta përdorësh kohën tënde për të folur për diçka më të rëndësishme. Jo për hundën time”.
Në përmbyllje, Frederiksen i dërgoi një mesazh mbështetjeje grave që përballen shpesh me kritika të ngjashme për pamjen e tyre. “Sot ju dërgoj një mendim të veçantë dashurie të gjithëve ju që duhet të duroni ‘papërsosmëritë perfekte’ me të cilat përballemi çdo ditë”, shkroi ajo, duke shprehur solidaritet ndaj përvojave të komunitetit femëror në sferën publike.
