Një rast i rëndë dhune ndaj një fëmije me nevoja të veçanta u bë publik rreth një muaj më parë në emisionin investigativ “Fiks Fare”, ku u transmetuan pamje që tregojnë nënën duke ushtruar dhunë fizike ndaj djalit të saj, i diagnostikuar në spektrin autik, madje edhe në mes të rrugës. Denoncimet për situatën ishin bërë fillimisht nga fqinjët, të cilët kërkuan ndërhyrjen e institucioneve, duke pretenduar se gruaja kishte probleme të shëndetit mendor dhe nuk ishte në gjendje të kujdesej për fëmijën.
Sipas dëshmive, institucionet nuk ndërhynë menjëherë; qytetarëve u është kërkuar një listë e gjatë dokumentesh për të vijuar procedurat, ndërsa nëna konsiderohej ligjërisht përgjegjëse për kujdesin e fëmijës. Pas transmetimit të rastit, Ministria e Shëndetësisë dhe Mbrojtjes Sociale reagoi dhe angazhoi shërbimet sociale në terren. Një ditë pas publikimit, specialistët shkuan në banesën e familjes për të bërë një rivlerësim të gjendjes sociale-ekonomike dhe psikologjike. Nga ky vlerësim rezultoi se familja jeton në kushte të vështira ekonomike, ndërsa nëna paraqitet në gjendje të rënduar psikologjike.
Pas komunikimeve të gjata me grupin e punës dhe administratorin shoqëror të Bashkisë Tiranë, nëna ka dhënë pëlqimin që djali i saj të vendoset në një qendër rezidenciale për persona me aftësi të kufizuara. Drejtoria e Shërbimit Social njoftoi se kanë nisur procedurat për sistemimin e fëmijës në një qendër zhvillimi, ku ai do të marrë kujdesin dhe trajtimin e nevojshëm.
Ngjarja evidentoi edhe kushtet e rënda të jetesës së familjes: banesa ishte e dëmtuar dhe e pabanueshme, ndërsa situata sociale konsiderohej kritike. Pesë drejtorë të Bashkisë Tiranë u angazhuan për vlerësimin e plotë të kushteve të jetesës. Banesa është klasifikuar në kategorinë DS5, pjesë e programit të rindërtimit, dhe autoritetet vendosën që familjes t’i sigurohet një banesë sociale. Deri në rikonstruksionin e plotë, nëna dhe fëmija do të përfitojnë mbështetje të përkohshme dhe shërbime psiko-sociale nga qendrat komunitare.
