Parlamenti i Portugalisë ka miratuar një projektligj të propozuar nga partia e ekstremit të djathtë Chega, që ndalon veshjet që mbulojnë fytyrën për arsye fetare apo gjinore. Ligji ka marrë mbështetje nga partitë e qendrës së djathtë, ndërsa është kundërshtuar fort nga partitë e majta.
Sipas ligjit, ndalohet “përdorimi, në hapësirat publike, i veshjeve që mbulojnë ose pengojnë identifikimin e fytyrës”. Kjo nismë ndikon në gratë që mbajnë burka ose nikab. Megjithatë, projektligji përfshin disa përjashtime, duke mos zbatuar ndalimin në aeroplanë, ambiente diplomatike dhe në vende adhurimi. Gjithashtu, përjashtohen rastet kur fytyra mbulohet për arsye sigurie, klimatike ose sipas dispozitave ligjore të tjera.
Projekti tani do të shqyrtohet nga Komisioni për Çështjet Kushtetuese, të Drejtat, Liritë dhe Garancitë, ku mund të pësojë ndryshime para votimit përfundimtar. Për të hyrë në fuqi, ligji duhet të miratohet edhe nga presidenti Marcelo Rebelo de Sousa, që ka të drejtën ta kthejë pas ose ta referojë në Gjykatën Kushtetuese.
Në rast miratimi, ndalimi do të zbatohet në të gjitha hapësirat publike, përfshirë rrugët, shërbimet publike dhe protestat, me gjoba që variojnë nga 200 deri në 4,000 euro. Për ata që përpiqen të detyrojnë të tjerët për të mbuluar fytyrën përmes dhunës, mund të ketë deri në tre vjet burg ose gjobë.
Kreu i Chega-s, André Ventura, e argumentoi ligjin si një masë për të mbrojtur vlerat portugeze, duke thënë se çdo person që vjen në Portugali duhet të respektojë traditat e këtij vendi. Në anën tjetër, deputeti i Partisë Socialiste, Pedro Delgado Alves, e kritikoi këtë iniciativë si një përpjekje për të nxitur ndasi dhe urrejtje ndaj grupeve të caktuara fetare. PSD, partia në pushtet, shprehu gatishmëri për diskutime të mëtejshtme mbi ligjin.
Nëse miratohet përfundimisht, Portugalia do t’i bashkohet disa vendeve evropiane, si Franca dhe Belgjika, që kanë ndaluar mbulesat e fytyrës në hapësira publike për arsye sigurie dhe integrimi shoqëror.
