Papa Leoni XIV i kërkoi drejtuesve dhe anëtarëve të Vëllazërisë Meshtarake Shën Piu X që të heqin dorë nga plani për shugurimin e katër ipeshkvijve të rinj pa mandat papnor, duke paralajmëruar se një veprim i tillë do të përbënte një akt skizmatik për Kishën Katolike. Letra e Papës u dërgua pak para ceremonisë së planifikuar të mbahet në Écône të Zvicrës.
Mesazhi, drejtuar eprorit të përgjithshëm të Vëllazërisë, imzot Davide Pagliarani, u adresua jo vetëm atij, por sipas Papës edhe meshtarëve, seminaristëve dhe besimtarëve të lidhur me këtë bashkësi. Ati i Shenjtë shprehu vlerësimin për zellin apostolik dhe për dëshirën e tyre për t’u mbajtur besnikë ndaj Traditës, elemente që, si kujtoi ai, kanë bërë që Papë të mëparshëm të mbajnë një qëndrim të kujdesshëm dhe dashamirës ndaj Vëllazërisë.
Në letrën e tij, Papa i ftoi ata që të rishqyrtojnë vendimin dhe të mendojnë mbi pasojat që një shugurim i paautorizuar do të kishte për jetën shpirtërore të të besuarve. Ai i drejtohet komunitetit me fjalët: “Ju lutem dhe ju kërkoj me gjithë zemër: hiqni dorë nga kjo rrugë”, duke i bërë thirrje që të tërhiqen nga plani i shugurimit.
Sipas Papës, shugurimi i ipeshkvijve pa autorizimin e Selisë së Shenjtë do t’i privonte besimtarët nga marrja e ligjshme e sakramenteve që u nevojiten për jetën e tyre të krishterë. Në mesazhin e tij bëhet e qartë se, në disa raste, kjo prive do të ndikte edhe në marrjen e sakramenteve si rrëfimi dhe martesa, me pasoja direkte për praktikën dhe jetën sakramentale të komunitetit.
Vëllazëria Meshtarake Shën Piu X, sipas tekstit, është objekt i një thirrjeje papnore për të ndryshuar kursin e planifikuar, ndërsa Papa nënvizon nevojën që vendimi të rishikohet për të shmangur ndarjet dhe problemet që mund të lindin në jetën shpirtërore dhe sakramentale të besimtarëve.
