Disa orë pas transferimit në Burgun e Fierit, kryebashkiaku i Tiranës, Erion Veliaj, ka bërë të ditur se është vendosur në një ambient izolimi pranë tre të dënuarve për vrasje seriale me burgim të përjetshëm. Një letër nga qelia, e bërë publike nga avokati i tij, Plarent Ndreca, përshkruan kushte ku sipas Veliajt mungojnë uji dhe drita, nuk ka kujdes mjekësor, i është refuzuar ushqimi dhe është penguar komunikimi me familjarët dhe avokatin.
Në letrën e bërë publike Veliaj shkruan se është futur në izolim për 10 ditë, se nuk ka ujë dhe dritare, se nuk i është ofruar kujdes mjekësor dhe se është i vendosur në të njëjtin korridor me tre vrasës të dënuar me burgim të përjetshëm. Avokati Ndreca deklaron se Veliaj ka mbi tre javë që ka probleme me këmbën dhe ka kërkuar verifikim nga institucioni mjekësor, por kjo kërkesë nuk është pranuar. Po ashtu, avokati thotë se Veliaj nuk është ushqyer, duke shprehur dyshime mbi mënyrën e bërë të gjithë transferimit.
Në mbrëmje, Erion Veliaj u vizitua nga Avokati i Popullit, Endrit Shabani, dhe nga avokati i tij, Plarent Ndreca. Ky i fundit e cilësoi transferimin nga paraburgimi i Durrësit drejt Fierit si të paligjshëm. Veliaj mbahej në burgun e Durrësit që prej shkurtit 2025, kur u arrestua.
Transferimi drejt Burgut të Fierit ndodhi një ditë pasi Veliaj, nga qelia, komentoi fitoren e lëvizjes studentore në Serbi, duke e përshkruar rezultatin si rrëzim të asaj që ai e quajti “makiavelisti dhe populisti i Beogradit”. Ai po ashtu vuri në dukje se protestat e studentëve nuk i konsideronte si fundin e botës, por si fundin e një bote.
