Organizata Botërore Meteorologjike (OBM) paralajmëroi se ekziston një shans prej 80% që një ngjarje El Niño të zhvillohet midis qershorit dhe gushtit 2026, duke rritur rrezikun e ngjarjeve ekstreme të motit globalisht. Sipas përditësimit të agjencisë së OKB-së, temperaturat “jashtëzakonisht të ngrohta” në Oqeanin Paqësor tropikal po favorizojnë formimin e fenomenit, i cili do të ndikojë si temperaturat globale, ashtu edhe regjimin e reshjeve në shumë rajone. OBM vlerëson gjithashtu se ka “afër ose mbi 90% shanse” që fenomeni të zgjasë të paktën deri në nëntor dhe parashikon që, nëse ndodh, El Niño të jetë “të paktën i moderuar, nëse jo i fortë”.
El Niño karakterizohet nga rritja e temperaturave sipërfaqësore në pjesët qendrore dhe lindore të Paqësorit ekuatorial dhe është pjesë e një cikli natyror klimatik së bashku me La Niña, që ndikon në qarkullimin atmosferik global dhe shkakton shpesh ngjarje ekstreme moti. OBM kujton se ngjarjet e El Niño zakonisht ndodhin çdo dy deri në shtatë vjet dhe zgjatin rreth nëntë deri 12 muaj; El Niño i fundit në vitet 2023–2024 kontribuoi në regjistrimin e dy viteve më të ngrohta ndonjëherë.
Për periudhën qershor–gusht OBM parashikon dominim të temperaturave mbi normalen në pothuajse të gjitha rajonet e globit, me rritje të rrezikut të stresit nga nxehtësia, thatësirave në disa zona dhe ngjarjeve ekstreme si përmbytjet apo thatësirat e rënda. Në nivel rajonal, agjencia parashikon reshje nën mesataren në Bririn e Afrikës gjatë sezonit të shirave, musone më të dobëta se normalja në Azi Jugore dhe temperatura më të larta gjatë verës në Amerikën Qendrore. Ujërat më të ngrohta në Paqësor mund të favorizojnë formimin e uraganëve në pjesët qendrore dhe lindore të tij, ndërsa të kufizojnë aktivitetin në Atlantik.
Sekretarja e Përgjithshme e OBM-së, Celeste Saulo, kërkoi përgatitje për një El Niño potencialisht të fortë që do të përkeqësojë thatësitë, reshjet e dendura dhe valët e të nxehtit. Sekretari i Përgjithshëm i OKB-së, António Guterres, deklaroi se duhet të pranohet shkalla e emergjencës klimatike dhe paralajmëroi se kushtet e El Niño-s “do t’i hedhin benzinë zjarrit të një planeti që po ngrohet”, duke bërë thirrje për veprime urgjente kundër ndryshimeve klimatike dhe reduktimin e varësisë nga lëndët djegëse fosile. OBM thekson se nuk ka prova që ndryshimi i klimës po rrit frekuencën e El Niño-s, por pranon se këto fenomene natyrore ndodhin brenda një konteksti më të gjerë të ndryshimeve klimatike të shkaktuara nga aktiviteti njerëzor.