Nikoll Lesi komentoi në emisionin “Shqipëria Live” me Sidorela Gjonin publikimin e mesazheve private që lidhen me ish-drejtoreshën e SHISH, Vlora Hyseni. Ai theksoi se hetimi duhet të përqendrohet te çështjet kryesore dhe shprehu shqetësimin për ekspozimin publik të materialeve personale, duke vënë në dyshim mënyrën e trajtimit të informacionit që lidhet me jetën private të të akuzuarës.
Në pjesë të bisedës të transmetuara, Lesi tha: “Ish-drejtoresha e Shërbimit Informativ duhet të akuzohet për gjërat kryesore. Pashë dje në portale disa mesazhe që ishin skandaloze, futen në çështje private, çështje intime. Ato janë çështje të personalitet të saj, të familjes së saj. Nuk mundet që gjithë kazani i madh që ka SPAK të dalë në publik. Ky është mendimi im, ndoshta e kam gabim.” Ai argumentoi se disa nga mesazhet e shpërndara bien në fushën private dhe intime, që nuk duhet të jenë pjesë e ekspozimit publik.
Moderatores Sidorela Gjoni i interesoi ndikimi i këtij lloj ekspozimi mbi institucionin e SHISH dhe ndarjen mes drejtueses si individ dhe institucionit. Gjoni pyeti: “A e dëmton kjo institucionin? Pra, a dinë njerëzit t’a ndajnë drejtuesen, individin nga SHISH?” Përgjigja e Lesit ishte e shkurtër: “E dëmton.”
Gjoni shtoi shqetësimin se dëmi i perceptimit publik mund të shtrihet edhe te pasardhësit e mundshëm të drejtimit të SHISH, duke thënë se: “nesër pasnesër, kur të shkojë dikush tjetër të bëhet drejtues i SHISH do të thonë ‘aty bëhet nami’.” Lesi konfirmoi se në rrjetet sociale perceptimi është negativ: “Po të shohësh rrjetet sociale, është një masakër e vërtetë, e madhe, krijon në perceptimin publik se në SHISH bëhet nami.” Megjithatë, ai nënvizoi se brenda Shërbimit Informativ kishte zyrtarë që, pavarësisht akuzave ndaj drejtueses, janë korrektë dhe seriozë.
Materiali u transmetua nga Top Channel.
