Një nëndetëse e Marinës Ushtarake Greke u ngatërrua në rrjetat e një anije peshkimare në detin Egje, midis ishujve të Androsit dhe Tinos. Sipas mediave greke, bëhet fjalë për një nëndetëse të klasës “Papanikolis” (Type 214). Incidenti ndodhi gjatë ditës, ndërsa nëndetësja merrte pjesë në stërvitjen kombëtare “KATAIGIDA 26”.
Sipas njoftimeve të para nga burimet e Marinës, nëndetësja nuk humbi aftësinë lëvizëse dhe është ngritur tashmë në sipërfaqe. Në zonë gjendet edhe një mjet i Rojës Bregdetare Greke, që po monitoron ngjarjen. Burimet zyrtare të Marinës bëjnë me dije se gjatë zhvillimit të stërvitjes, në orët e mëngjesit të së enjtes, 14 maj 2026, një nëndetëse në zhytje konstatoi praninë e një anijeje peshkimi pranë saj dhe ndërmori të gjitha procedurat e nevojshme të sigurisë.
Në komunikimin e Marinës theksohet se stërvitja “KATAIGIDA26” përfshin një seri ushtrimesh me skenarë realistë, ku njësitë e Flotës ushtrohen në kushte që imitojnë situata reale; në këtë kontekst, nëndetëset operojnë shpesh në zona me trafik detar të dendur. Sipas të njëjtave burime, pas incidentit nëndetësja ka vazhduar normalisht pjesëmarrjen në stërvitje.
Raportimet nuk përmendin dëme apo persona të lënduar; theksohet vetëm se nëndetësja nuk humbi sistemin e saj të lëvizjes dhe u ngrit në sipërfaqe. Nuk ka detaje shtesë për anijen peshkarexheje të përfshirë, për shkak të informacionit të limituar të shpërndarë në burimet mediatike dhe deklaratave të Marinës.
Lajmi është raportuar nga mediat greke dhe përcillet me referencë në komunikatat zyrtare të Marinës Ushtarake, ndërsa autoritetet detare dhe forcat bregdetare mbeten të pranishme në zonën mes Androsit dhe Tinos për monitorim dhe sigurim të operacioneve të vazhdueshme të stërvitjes.
