Ministria e Mbrojtjes publikon bilancin e situatës së zjarreve në 24 orët e fundit: raportohen 29 vatra zjarri, prej të cilave 11 vijojnë të jenë aktive, 3 janë në monitorim dhe 4 janë nën kontroll. Për përballimin e situatës janë angazhuar 249 efektivë të MZSH-së, 48 forca policore, 233 forca bashkiake, të AdZM-së, Shërbimit Pyjor dhe ASHP-së, 206 vullnetarë dhe 118 efektivë të Forcave të Armatosura. Në operacione janë përfshirë 43 automjete zjarrfikëse, ndërsa Forcat e Armatosura kanë vënë në dispozicion 9 automjete zjarrfikëse, 4 autobote, 3 ambulanca, 3 helikopterë dhe 2 avionë Air Tractor.
Në Dajt, Tiranë, vijon ndërhyrja mbi tunelet e Qafë-Mollës; autoritetet raportojnë se aktualisht nuk ka rrezik për zonat e banuara. Situata po monitorohet edhe në Priskë të Madhe, pa rrezik të evidentuar për banesat. Në Përmet, Gjirokastër, mbeten aktive vatrat në malin e Nëmërçkës dhe malin e Dhëmbelit; terreni i vështirë po vështirëson ndërhyrjen, ndërsa forcat zjarrfikëse, punonjësit e sektorit pyjor dhe vullnetarët punojnë për izolimin e zjarrit, pa raportim rreziku për zonat e banuara.
Në Gurë-Lurë, Dibër, vazhdon një nga operacionet më të rëndësishme: janë angazhuar 120 forca të bashkisë, 57 efektivë të Forcave të Armatosura, 15 forca policore, 15 vullnetarë dhe 9 punonjës të AdZM-së. Ndërhyrja ka vendosur nën kontroll perimetrin pranë banesave dhe ka shmangur rrezikun për to; nga ajri kanë operuar dy avionë Air Tractor, ndërsa puna vijon në dy drejtime ku zjarri ruan intensivitet. Në Qafën e Helmes, Bulqizë-Dibër, vatra mbetet aktive në zonë pyjore me angazhimin e 10 efektivëve të MZSH-së, 6 forcash bashkiake dhe 6 nga njësia administrative Selishtë.
Në Troje, Mirditë, për izolimin e vatrës punojnë 13 efektivë të MZSH-së me 3 automjete zjarrfikëse, 36 forca bashkiake, 3 punonjës policie, 20 vullnetarë, si dhe 30 efektivë të Forcave të Armatosura me dy automjete zjarrfikëse. Në Shkodër vatrat aktive janë në Rrencë dhe Goraj-Budishtë; MZSH dhe Shërbimi Pyjor punojnë për izolimin dhe shuarjen, ndërsa në Goraj-Budishtë nuk raportohet rrezik për banesat dhe vatra po shkon drejt izolimit. Në Elbasan, vatra aktive vijojnë në Dardhë të bashkisë Librazhd dhe në Shalë të bashkisë Cërrik; për Dardhën nuk raportohet rrezik për zonat e banuara.
Operacionet po vijojnë të koordinuara nga toka dhe ajri, dhe në disa zona ndërhyrjet kanë mundësuar mbrojtjen e banesave dhe kufizimin e përhapjes së flakëve. Agjencia Kombëtare e Mbrojtjes Civile, përmes Qendrës Kombëtare Operacionale të Emergjencave Civile, vijon monitorimin dhe koordinimin e kapaciteteve në terren sipas nevojës.
