David Fadairo ishte një prej protagonistëve të Dinamos në mbrëmjen e mrekullueshme evropiane kur kryeqytetasit fituan 4-0 ndaj Audas dhe sigurojnë kualifikimin për në playoff. Kualifikimi u festua me entuziazmin më të madh, por ngjalli edhe keqardhje pasi sulmuesi nigerian do të duhet të largohet nga Dinamo për t’u rikthyer te Partizani.
Largimin e konfirmoi vetë Fadairo në një video të postuar në Instagram Story, ku shfaqej duke festuar në dhomën e zhveshjes së Dinamos me pjesën tjetër të skuadrës, ndërsa mbi të ishte një mesazh që konfirmonte largimin. Në mesazhin e publikuar ai shkroi: ‘Paçi fat në playoff djema. Do të më mungoni shumë dhe faleminderit për të gjithë dashurinë, Dinamo’.
Fadairo është lojtar i Partizanit dhe ishte huazuar te Dinamo vetëm për pjesëmarrjen në Conference League. Marrëveshja mes dy klubeve ishte e vlefshme deri në përfundim të raundit të tretë kualifikues të kompeticionit; tani ky akord ka skaduar, prandaj futbollisti do t’i duhet të kthehet te Partizani. Në përfundim të huazimit, ai pritet të vendoset nën urdhrat e trajnerit Bratu, ndërsa javën e ardhshme nis Kategoria Superiore e sezonit 2026/27.
Lajmi vjen pas performancës së mirë të Dinamos në takimin me Audas, ku skuadra fitoi bindshëm dhe avancoi në fazën e mëtejshme të kompeticionit. Nga ana e klubit dhe e tifozërisë festa pas kualifikimit ishte e madhe, por skuadra përballet tani me ndryshime në përbërje për shkak të skadimit të marrëveshjes së huazimit të Fadairos.
