Një ngjarje e pazakontë tronditi Meerut në Uttar Pradesh, Indi, kur një burrë 32-vjeçar u gjet i vdekur në banesën ku jetonte me gruan dhe djalin gjashtëvjeçar. Viktima, Atul Kumar Panwar, ishte pronar i një qendre private për kujdes fëmijësh dhe u gjet i pajetë të premten në mëngjes. Policia po hetonsi si fillimisht ngjarje aksidentale, por më pas dyshohet se bëhej fjalë për një vrasje të paramenduar.
Hetuesit mbajnë se bashkëshortja 32-vjeçare ka planifikuar krimin së bashku me shoferin e autobusit të shkollës, me të cilin dyshohet se kishte një marrëdhënie jashtëmartesore. Sipas policisë, autorët fillimisht i dhanë viktimës qumësht të përzier me pilula gjumi; pasi ai ra në gjumë, ata dyshohet se përdorën një gjarpër krait—një nga speciet më helmues të Azisë—që ta kafshonte ndërsa flinte, me qëllim që vdekja të dukej si pasojë e një pickimi aksidental.
Të nesërmen në mëngjes, gruaja i njoftoi fqinjët se bashkëshorti kishte ndërruar jetë nga pickimi i një gjarpri. Zvarraniku u gjet pranë trupit në shtrat dhe u vra nga banorët e zonës. Në trupin e Panwar u konstatuan shenja kafshimi në dorë dhe këmbë, çka bëri që fillimisht ngjarja të konsiderohej aksidentale. Hetimet morën një tjetër drejtim pasi babai i viktimës denoncoi pranë autoriteteve dyshimet për përfshirjen e nusës së tij.
Policia zbuloi se shoferi i autobusit kishte punuar në qendrën e familjes vetëm tre muaj dhe dyshohet se kishte krijuar marrëdhënie jashtëmartesore me gruan e viktimës. Në përfundim të hetimeve, autoritetet arrestuan katër persona: bashkëshorten e viktimës, të dashurin e saj të dyshuar dhe dy persona që merreshin me kapjen dhe trajtimin e gjarpërinjve, të cilët akuzohen se siguruan dhe përdorën zvarranikun helmues për realizimin e planit.
Çifti ishte martuar në vitin 2019 dhe kishte hapur qendrën për kujdes fëmijësh vetëm tri muaj më parë, ku punonte edhe shoferi i autobusit. Sipas shefit të policisë së distriktit, provat e mbledhura deri tani tregojnë se bëhet fjalë për një vrasje të paramenduar, e organizuar me qëllim që të maskohej si një vdekje aksidentale nga pickimi i një gjarpri.
