Ndërtimi mban lart ndjesinë ekonomike në Shqipëri, ndërsa pjesa tjetër e ekonomisë jep sinjale më të dobëta. Banka e Shqipërisë njoftoi për shtator që Treguesi i Ndjesisë Ekonomike u rrit me vetëm 0.3 pikë, duke qëndruar 7.8 pikë mbi mesataren historike. Pas kësaj rritjeje të lehtë fshihen luhatje sektorale.
Besimi në ndërtim u rrit me 6.6 pikë përqindjeje, i mbështetur si nga vlerësimi për aktivitetin aktual ashtu edhe nga kontratat e reja, duke bërë që besimi të qëndrojë 18 pikë mbi mesataren afatgjatë. Ndërkohë, industria humbi 3.8 pikë, shërbimet 2.4 dhe tregtia 1.8 pikë. Në industri rënia lidhet kryesisht me vlerësimet më pak pozitive për prodhimin, ndërsa në shërbime bizneset vlerësojnë më dobët kërkesën dhe aktivitetin aktual.
Ministria e Ekonomisë në konferencën e fundit tha se protestat ndikuan në besimin e bizneseve, duke shkaktuar edhe anulime në turizëm. Tregtia shënon rënie për të disatin muaj radhë. Nga ana e konsumatorit, besimi u rrit me 2.3 pikë, me përmirësim të vlerësimeve për financat personale, ekonominë e vendit dhe blerjet.
Sipas Bankës së Shqipërisë, të dhënat e shtatorit tregojnë se klima ekonomike mbetet pozitive, megjithëse ritmet e përmirësimit mbështeten kryesisht nga ndërtimi dhe besimi më i lartë i konsumatorëve, ndërsa sektorët e tjerë vijojnë sinjale ngadalësimi.
Treguesi i Ndjesisë Ekonomike (Banka e Shqipërisë) për muajt e parë të vitit: Janar 110.24; Shkurt 107.43; Mars 107.90; Prill 106.22; Maj 107.16; Qershor 106.37; Korrik 105.35; Gusht 107.51; Shtator 107.80.
Besimi në ndërtim (mujor): Janar 3.1%; Shkurt -6.5%; Mars -4%; Prill 4.9%; Maj 0.7%; Qershor -0.8%; Korrik -4.6%; Gusht +4.7%; Shtator +6.6%.
Sektorët me rënie të besimit (Banka e Shqipërisë): Industria -3.8%; Shërbimet -2.4%; Tregtia -1.8%.
