Mëngjesin e sotëm në Kuvendin e Kosovës u mbajtën homazhe në nderim të jetës dhe veprës së akademikut Rexhep Qosja, i cili ndërroi jetë ditën e djeshme në moshën 89-vjeçare. Ushtruesja e detyrës së presidentes së Kosovës, Albulena Haxhiu, shkroi në librin e zisë të hapur për akademikun.
Rexhep Qosja lindi më 1936 në Vuthaj të Malit të Zi. Katër klasat e para të shkollës fillore i kreu në Vuthaj, ndërsa gjysmëmaturën e ndjeki në Guci. Më 1959 mbaroi Shkollën Normale në Prishtinë dhe në vitin 1960 u regjistrua në Degën e Gjuhës dhe të Letërsisë Shqipe të Fakultetit Filozofik të Prishtinës, ku u diplomua në 1964.
Në vitin 1967 u pranua si asistent në Institutin Albanologjik të Prishtinës dhe gjatë viteve 1967/68 specializoi shkencën e letërsisë në studimet e shkallës së tretë në Fakultetin Filologjik të Universitetit të Beogradit. Në 1969 u zgjodh bashkëpunëtor shkencor i Institutit Albanologjik, ndërsa më 1971 mbrojti tezën e doktoratës mbi jetën dhe krijimtarinë e Asdrenit. Pas doktorimit, në 1972 u emërua bashkëpunëtor i lartë dhe më pas këshilltar shkencor në Institutin Albanologjik, si dhe profesor inordinar e më pas profesor ordinar në Fakultetin Filozofik të Prishtinës.
Qosja shërbeu si drejtor i Institutit Albanologjik prej 1972 deri më 1981, ishte shef i Degës së Letërsisë dhe të Gjuhës Shqipe të Fakultetit Filozofik për shumë vite dhe në vitet 1974-1975 kryeredaktor i jashtëm i revistës letrare Jeta e Re.
Si autor ka mbi tridhjetë libra që përfshijnë studime për letërsinë dhe kritikë letrare, prozë artistike, tregime, romane, drama, publicistikë dhe shkrime polemike. Ka botuar recensione, vështrime, artikuj, sprova, trajtesa dhe studime në revista shkencore e letrare, duke trajtuar çështje të veçanta të letërsisë shqipe; disa prej veprave të tij janë përkthyer në gjuhë të tjera.
Për veprimtarinë shkencore e letrare është vlerësuar me disa çmime, përfshirë Shpërblimin e qytetit të Prishtinës (1968), Shpërblimin Krahinor të Dhjetorit (1969), dy shpërblime të SHSH së Kosovës (1972, 1974), Shpërblimin e RS të Serbisë “7 Korriku” (1975) dhe Çmimin “Pjetër Bogdani” (2010) për romanin “Bijt e askujt”. Ka pasur edhe veprimtari politike; në periudhën 1998–2000 drejtoi një parti politike në Kosovë. Në vitin 2000, kryetari i Republikës së Shqipërisë i dha çmimin “Nderi i Kombit”.
