Kryetari i Parlamentit të Iranit, Mohammad Bagher Ghalibaf, ka reaguar me ironi ndaj Shteteve të Bashkuara lidhur me rritjen e çmimit të naftës, duke akuzuar drejtpërdrejt administratën e Donald Trump për politika që, sipas tij, kanë kontribuar në këtë zhvillim. Në një postim në rrjetet sociale, Ghalibaf sulmoi sekretarin e Thesarit, Scott Bessent, dhe ata që, në fjalët e tij, “shtyjnë teorinë e bllokadës dhe e çuan çmimin e naftës mbi 120 dollarë”.
Ai paralajmëroi për rritje të mëtejshme të çmimeve, duke shkruar: “Ndalesa tjetër: 140”, shprehje e përdorur për të sinjalizuar pritshmërinë e vazhdimit të ngritjes së çmimeve. Ghalibaf hodhi poshtë gjithashtu deklaratat e mëparshme të presidentit amerikan, i cili kishte paralajmëruar se infrastruktura e naftës në Iran mund të “shpërthejë” brenda tre ditësh për shkak të mungesave në furnizim.
Duke iu përgjigjur kësaj parashikimi, Ghalibaf theksoi me ironi se “Tre ditë më vonë, asnjë pus nuk shpërtheu”, duke vënë në pikëpyetje saktësinë e paralajmërimeve të dhëna nga ana amerikane. Ai shtoi më tej se Irani mund “ta zgjasë këtë në 30 ditë dhe ta transmetojë drejtpërdrejt një pus nafte”, një koment që nënvizon tonin sarkastik të reagimit të tij ndaj deklaratave të kundërshtarit.
Sipas Ghalibaf, administrata amerikane po udhëhiqet nga “këshilla të pavlera”, dhe ai theksoi se problemi kryesor nuk qëndron te “teoria”, por te mënyra e të menduarit që, sipas tij, po e çon atë administratë drejt vendimeve të gabuara. Komentet e tij përqendrohen në kritikën e politikave amerikane dhe në përbuzjen e parashikimeve të bëra publikisht rreth ndikimeve mbi industrinë e naftës iraniane.
Lajmi është publikuar nga Top Channel.
