Ish-modelja e OnlyFans, Courtney Clenney, është dënuar me gjashtë vite burg pas pranimit të një marrëveshjeje fajësie për vrasje nga pakujdesia me armë të ftohtë lidhur me vdekjen e të dashurit të saj, Christian “Toby” Obumseli. Gjykata i shtoi edhe pesë vite mbikëqyrje në komunitet si pjesë të vendimit penal.
Ngjarja ndodhi më 3 prill 2022 në apartamentin ku çifti jetonte në Miami, kur Obumseli, 27 vjeç, u godit me thikë dhe ndërroi jetë nga plagët. Clenney kishte pretenduar më parë se veprimi ishte në vetëmbrojtje, duke deklaruar se kishte hedhur thikën drejt të dashurit nga rreth tre metra larg. Prokuroria kundërshtoi këtë version, dhe çështja u zhvillua në një proces të gjatë para marrëveshjes së fajësisë.
Fillimisht ndaj Clenney ishte ngritur akuza për vrasje të shkallës së dytë, por pas marrëveshjes me prokurorinë akuza u reduktua dhe ajo pranoi fajësinë për vrasje nga pakujdesia me armë të rrezikshme, duke shmangur një gjyq të plotë. Marrëdhënia midis Clenney dhe Obumselit përshkruhet në materialin e çështjes si tepër konfliktuale, me përplasje të përsëritura gjatë lidhjes së tyre. Avokatët e Clenney planifikonin të paraqisnin prova që ajo ishte viktimë e abuzimit nga Obumseli, ndërsa familja e 27-vjeçarit pretendonte se ai përjetonte abuzim nga ana e Clenney.
Pas ngjarjes, Clenney u arrestua në Hawaii dhe është qëndruar në paraburgim që prej vitit 2022. Koha e kaluar në paraburgim llogaritet në dënimin prej gjashtë vitesh, dhe sipas raportimeve ajo mund të ketë rreth dy vite të mbetura për të vuajtur, në varësi të krediteve dhe kushteve të dënimit. Përveç dënimit me burg, vendimi përfshin periudhën prej pesë vjet mbikëqyrje në komunitet që do të vijojë pas lirimit.
