“Mirupafshim”, ishte ky postimi i fundit në Facebook i Simona Lidullit. Gruaja u gjet e pajetë mëngjesin e djeshëm në shtëpinë e saj në lagjen Ardeatino në Romë, e goditur me armë zjarri.
Ndërkohë në profilin e të dashurit të saj, Valerio Savino, u gjet një tjetër postim që lajmëronte fatkeqësinë: “Lamtumirë të gjithë miqtë e mi. Jeta ime tokësore dhe ajo e Simonës përfundon këtu”.
Ai u gjet i vdekur në makinën e tij në parkingun e një qendre tregtare.
Hetimet, të koordinuara nga prokurori i Romës Michele Prestipino, tregojnë se kemi të bëjmë me një vetëvrasje të përbashkët, për shkak të sëmundjes së njërit prej të dyve.
Një vdekje e dyfishtë e shpallur drejtpërdrejt në rrjetet sociale, para një audience miqsh dhe të afërmish.
Shumë prej miqve që lexuan mesazhin ngritën alarmin. “Ju lutem, ata që jetojnë në Romë të shkojnë menjëherë në shtëpinë e Simonës, në via Adolfo Consolini 51”, shkruan një i afërm nën postimin e fundit të gruas.
