Në fushën e sigurisë ushqimore, Shqipëria nuk zbaton të njëjtat rregulla si Bashkimi Evropian, as për llojet e pesticideve të përdorura në të mbjella dhe as për sasinë e mbetjeve të pesticideve të lejuara në fruta e perime. Raporti përfundimtar i auditimit të Kontrollit të Lartë të Shtetit (KLSH) raporton se Ministria e Bujqësisë, gjatë viteve 2022–2024 kur drejtohej nga Anila Denaj, ka lejuar tregtimin e pesticideve të ndaluara nga BE-ja; verifikimi i Listës nr.1 të produkteve për mbrojtjen e bimëve tregoi se në atë periudhë kanë qenë në qarkullim 10 produkte të tilla.
Afatet për nxjerrjen jashtë qarkullimit të këtyre produkteve janë zgjatur përtej afateve të përcaktuara nga BE-ja. KLSH thekson se përgjegjësia për nivelet e larta të mbetjeve të pesticideve nuk bie vetëm mbi fermerët, por se abuzimi me përdorimin e kimikateve nis edhe në nivelet e politikave dhe rregullimit administrativ në Ministri.
Sipas udhëzimit nr.11, datë 10.05.2021, për nivelin maksimal të mbetjeve të pesticideve në fruta dhe perime, Shqipëria lejon nivele më të larta sesa BE-ja. Zgjatja e këtij akti rregullator nga viti 2021 deri në 2025 ka legjitimuar normat e larta të mbetjeve, duke përjashtuar automatikisht disa produkte nga eksporti në vendet e BE-së.
Auditimi evidenton se Shqipëria ka miratuar nivele të lejuara të mbetjeve deri në 100 herë më të larta se standardet evropiane. Shembujt përfshijnë: Tebuconazole në luleshtrydhe (75 herë më shumë), Phosmet në mandarina (deri 50 herë), Imidacloprid në ullinj (100 herë), Propiconazole (30 herë) dhe Oxamyl (10 herë). Nivele mbi normat e BE-së janë përcaktuar për produkte si luleshtrydhet, mandarinat, shalqiri, kastraveci, patatet dhe lulelakra, duke prekur drejtpërdrejt interesat e fermerëve vendas.
Ligje dhe akte që largohen nga standardet evropiane sjellin pasoja negative për fermerët, sepse produktet e kontaminuara nuk kalojnë kontrollet doganore për eksport, pasi BE i konsideron rrezik për shëndetin e konsumatorëve. Në përfundim, KLSH i kërkoi Ministrisë së Bujqësisë përafrimin e legjislacionit për sigurinë ushqimore dhe mbrojtjen e bimëve me atë të BE-së, duke i lënë afat deri më 30 shtator. Burimi: Top Channel.
