Deri në momentet e fundit kryemenistri Edi Rama po mban në ankth udhëheqjen e PS, për momentin kur do të zbulojë sekretin e emrave që do të fusë në Kabinetin e tij të ri. Asambleja Kombëtare e Partisë Socialiste do të mblidhet këtë të enjte në Tiranë, për të bërë bilancin e rrugëtimit të fundit 4 vjeçar të kësaj force politike në drejtimin e vendit, si dhe për të njohur të vetët dhe gjithë shqiptarët me Kabinetin “Rama 4”.
Si askush tjetër në Shqipërinë demokratike, Edi Rama do të qeverisë për një mandat të katërt radhazi, ndërsa sot do të shpallet dhe qeveria e re e cila nesër pritet të votëbesohet dhe në Kuvend. Sipas dekretit të Presidentit Begaj, Kuvendi duhet të mblidhet më 12 Shtator.
Plot 400 anëtarët e Asamblesë Kombëtare të Partisë Socialiste, organi më i lartë vendimmarrës pas Kongresit, janë njoftuar për ngjarjen e sotme dhe në orën 11:00 do të jenë në Pallatin e Kongreseve.
Ashtu si çdo herë, Edi Rama ia arriti që edhe kësaj radhe të ruajë ekskluzivitetin e emrave të bashkëpunëtorëve, me të cilët do të drejtojnë vendin në nisje të këtij kapitulli të ri.
Pavarësisht emrave që kanë qarkulluar në media gjatë ditëve të fundit, kryeministri dhe numri një i Partisë Socialiste ka mundur të ruajë mjaft mirë emrat e ministrave të rinj, deri sot, për t’i prezantuar anëtarëve të Asamblesë Kombëtare.
Fillim shtatori ka qenë i ngjeshur me takime dhe telefonata për kryeministrin, për formëzimin e qevrisë së tij.
