Leicester City, fitues i titullit të Premier League dhjetë vite më parë, po përballet me kërcënimin e rënies në Divizionin e Tretë të futbollit anglez. Kjo situatë erdhi pas një vendimi të Komisionit të Pavarur që e penalizoi klubin me heqjen e 6 pikëve për thyerje të normave financiare.
Pas rënies nga Premier League në sezonin e kaluar, Leicester tani ndodhet në vendin e 20 në Championship, duke qëndruar jashtë zonës së rënies vetëm falë golavarazhit. Komisioni zbuloi se klubi kishte tejkaluar kufirin e parashikuar nga normat financiare për periudhën trevjeçare deri në sezonin 2023/24, me një shumë prej rreth 21 milionë paundësh (më shumë se 24 milionë euro). Nga viti 2021 deri në 2024, Leicester ka regjistruar humbje totale prej mbi 200 milionë paundësh (230 milionë euro).
Në një përgjigje ndaj sanksionit, klubi e cilësoi atë si të paarsyeshëm, duke argumentuar se nuk merreshin parasysh faktorët lehtësues. Situata është përkeqësuar gjithashtu nga mungesa e një trajneri të përhershëm pas shkarkimit të Marti Cifuentes javën e kaluar. Leicester ka pësuar katër humbje radhazi në kampionat, duke i detyruar tifozët të nostalizojnë për sukseset e së kaluarës.
Pas triumfit në FA Cup në vitin 2021, Leicester përjetoi një rënie në Championship vetëm për t’u rikthyer sërish në Premier League nën drejtimin e Enzo Marescas. Megjithatë, një tjetër rënie nga kategoria ka hapur krizën aktuale për klubin. Situata e krijuar ka rritur tensionet dhe dyshimet në lidhje me të ardhmen e klubit, ndërsa tifozët shpresojnë për një kthesë pozitive.
