Drejtuesja Politike e PS Tiranë, Ogerta Manastirliu, vizitoi familjet e prekura nga zjarri që përfshiu një pallat pranë Farmacisë 10 në Tiranë. Ajo ishte e shoqëruar nga deputetë të Partisë Socialiste dhe drejtues të Bashkisë Tiranë, dhe gjatë takimeve u angazhua se institucionet janë të mobilizuara për t’u qëndruar pranë banorëve dhe për të ofruar zgjidhje konkrete sa më shpejt.
Manastirliu theksoi përkushtimin politik, institucional dhe njerëzor për mbështetjen e familjeve të prekura. Ajo njoftoi se Bashkia e Tiranës ka nisur menjëherë punën dhe se shumë shpejt do të mblidhet Këshilli Bashkiak për të miratuar bonuset e qirasë, me qëllim shmangien e çdo vonese në procedurat administrative. Sipas saj, prioritet mbetet siguria e banorëve dhe rikthimi në normalitet i çdo familjeje të prekur.
Procesi i verifikimit dhe vlerësimit të dëmeve është nisur dhe po vazhdon me intensitet. Manastirliu deklaroi se vlerësimi i dëmeve po kryhet në mënyrë të detajuar nga institucionet dhe grupet e ekspertizës, dhe se dëmshpërblimi do të përcaktohet sipas akteve nënligjore. Ajo shtoi se dëmshpërblimi do të finalizohet sa më shpejt dhe se vlerësimet do të bëhen rast pas rasti. Deputetët e Tiranës, sipas Manastirliut, do të ndjekin këto procese për të siguruar që të mos ketë vonesa administrative në zbatimin e masave.
Përveç masave të ndihmës dhe verifikimit të dëmeve, autoritetet kanë nisur hetimet për të përcaktuar përgjegjësitë lidhur me ngjarjen. Manastirliu theksoi se përveç ndihmës së menjëhershme për banorët, do të ndiqet edhe aspekti i zbardhjes së shkakut dhe përcaktimit të përgjegjësive për ngjarjen.
