Klubi i Santos ka shkaktuar debat me një komunikatë zyrtare, duke kundërshtuar vlerësimin mjekësor të Federatës Braziliane të Futbollit (CBF) për shkallën dhe kohëzgjatjen e dëmtimit të Neymar Jr. Gjithçka nisi pas deklarimit të mjekut të kombëtares, Rodrigo Lasmar, sipas të cilit numri 10 ka një dëmtim të shkallës së dytë në pulpën e këmbës së djathtë, pas një goditjeje në ndeshjen Santos–Coritiba më 17 maj. Lasmar tha se Neymar duhet të qëndrojë jashtë fushës për 2 deri në 3 javë, duke e bërë të pamundur pjesëmarrjen në miqësoret ndaj Panamasë dhe Egjiptit dhe duke rrezikuar pjesëmarrjen në ndeshjen hapëse të Botërorit 2026 kundër Marokut më 13 qershor.
Santos reagoi menjëherë, duke cilësuar si tepër pesimiste këtë prognozë. Klubi njoftoi se të gjitha ekzaminimet mjekësore dhe rezonancat e Neymarit i janë dorëzuar CBF-së më 18 maj, ditën e grumbullimit zyrtar nga trajneri Carlo Ancelotti. Sipas klubit, periudha e rikuperimit prej dy javësh duhet të llogaritet nga data e dëmtimit, 17 maji, dhe përfundon më 31 maj, që do të bënte lojtarin teorikisht të gatshëm për t’u rikthyer në aktivitet atë ditë.
Në komunikatë klubi thekson se departamenti mjekësor është “plotësisht i harmonizuar me programin e trajtimit të përcaktuar”, por gjithashtu nënvizon se parashikimet mund të ndryshojnë në varësi të organizmit të çdo lojtari, nevojave të skuadrës dhe rëndësisë së ndeshjeve. Santos shpreh besimin e plotë se Neymar do të jetë në fushë për Kupën e Botës, duke kundërshtuar alarmin për një ndërprerje të gjatë.
Në fokus mbetet vendimi i fundit i stafit tekniko-mjekësor të Brazilit: nëse trajneri Ancelotti dhe ekipi i tij do ta aktivizojnë Neymar para përfundimit të periudhës së rikuperimit ose do të ndjekin një qasje më të kujdesshme, duke marrë në konsideratë rreziqet e mundshme për lojtarin dhe skuadrën.
