Lufta në Ukrainë është rikthyer në qendër të agjendës ndërkombëtare, ndërsa liderët e G7 mblidhen këtë javë në Francë për të shqyrtuar zhvillimet në front dhe përpjekjet diplomatike për paqe. Presidenti amerikan Donald Trump zhvilloi telefonata të ndara me presidentin rus Vladimir Putin dhe me presidentin ukrainas Volodymyr Zelensky, në prag të samitit të G7 në Evian.
Sipas Zelenskyt, biseda me Trump përfshiu “disa ide të mira” që mund të ndihmojnë në afrimin e paqes, dhe ai informoi presidentin amerikan mbi situatën në front dhe pozicionin aktual të forcave ukrainase. Nga ana tjetër, Kremlini njoftoi se gjatë bisedës me Putinin, Trump theksoi se përfundimi i konfliktit në Ukrainë është jetik dhe shprehu gatishmërinë për të ndihmuar në procesin e paqes.
Këto zhvillime diplomatike shfaqen ndërsa lufta mbetet një nga temat kryesore të diskutimeve mes liderëve të G7. Samiti pritet të analizojë edhe ndikimin e konfliktit në sigurinë dhe në ekonominë globale, duke u përqendruar në koordinimin mes aleatëve perëndimorë. Presidenti francez Emmanuel Macron ka ftuar Zelenskyn në një seancë të veçantë pune me udhëheqësit e G7, ku do të diskutohet progresi në terren dhe hapat e ardhshëm drejt një zgjidhjeje të mundshme politike.
Sipas burimeve diplomatike, fokusi kryesor i samitit pritet të mbetet gjetja e një formule për uljen e tensioneve dhe hapjen e negociatave të drejtpërdrejta mes palëve në konflikt. Në këtë kuadër, udhëheqësit e G7 do të kërkojnë koordinim të veprimeve dhe mënyra për të përshpejtuar përpjekjet diplomatike, pa dhënë detaje të mëtejshme mbi masat konkrete që do të merren gjatë takimit. Top Channel.
