Kryeministri Edi Rama reagoi pas bllokimit për disa orë të autostradës Tiranë-Durrës dhe rrugës së Rinasit gjatë protestës së djeshme. Në një postim në rrjetet sociale ai tha se tubimet kanë humbur lidhjen me kauzën fillestare dhe po dëmtojnë imazhin e Shqipërisë, sezonin turistik dhe klimën e investimeve në vend, ndërsa kritikoi ashpër organizatorët duke i cilësuar zhvillimet e fundit të ndikuara nga “forca destruktive” dhe “ekstremizëm”. Rama theksoi se qeveria ka vepruar në përputhje me interesin publik dhe me standardet ndërkombëtare.
Në postimin e tij Rama sqaroi se protestuesit janë të lirë të protestojnë paqësisht, por vijoi me disa pika kritike: së pari, sipas tij protesta nuk ka më lidhje me Sazanin e Zvërnecin, pasi dokumentacioni i procesit dhe qasja e qeverisë tregojnë se ajo ka vepruar në lartësinë e interesit publik dhe të praktikave më të mira ndërkombëtare. Së dyti, protesta po godet imazhin e Shqipërisë dhe sezonin turistik, duke ushqyer një perceptim negativ se vendi është jomiqësor ndaj mjedisit, jomikpritës për investimet e huaja dhe i pasigurt për turistët; anulimet e rezervimeve të hoteleve dhe bllokimet e rrugëve, tha ai, paralajmërojnë një sezon jo pozitiv ekonomikisht për shumë familje dhe njerëz që varen nga industria e turizmit.
Së treti, Rama akuzoi se protesta është degraduar në një turmë të drejtuar nga “mendje të liga dhe duar të këqia” që bllokuan natën rrugën e aeroportit dhe penguan lëvizjen e lirë të mijëra njerëzve, duke sjellë sipas tij elemente ekstremizmi që nxisin bullizimin online dhe prishjen e ritmit të jetës së shumicës. Së katërti, ai shprehu keqardhje për të rinjtë që, siç tha, marshuan qorrsokak drejt Rinasit pas “skuthave të infiltruar” dhe i bëri thirrje që të shkëputen nga ato ndikime. Së pesti, Rama vuri në dukje se protesta ka eksaltuar personazhe publike që iu bashkuan me mendje të cekëta, me idenë se “deti u bë kos” dhe qeveria po mbytet.
Rama përfundoi se, sipas tij, përfitues të vërtetë nga kjo protestë janë vetëm dy: qeveria shqiptare, që do të nxjerrë mësimet e nevojshme dhe do të adresojë shqetësimet legjitime, dhe Partia Socialiste, e cila, kur të shpërndahet “mjegulla”, do të dalë më e madhe dhe më e fortë në skenën politike. Burimi: Top Channel.
