Protesta qytetare në Tiranë u zhvillua për të 24-ën ditë me radhë, me grumbullim në sheshin “Skënderbej” dhe marshim drejt Kryeministrisë. Para selisë së qeverisë u mbajtën thirrje dhe fjalime ku protestuesit kërkuan dorëheqjen e qeverisë dhe krijimin e një qeverie teknike, jo partiake, me mandat jo më pak se 12 muaj. Ata njoftuan gjithashtu se më 4 korrik diaspora do të bashkohet në protestë. Pas disa orësh pranë Kryeministrisë, qytetarët rifilluan marshimin nëpër rrugët e kryeqytetit.
Para Kryeministrisë u lexuan kërkesat e plota të protestuesve, të cilat përfshinin dorëheqjen e panegociueshme të Kryeministrit dhe të qeverisë, si dhe formimin e një qeverie teknike tranzitore, jopartiake, me mandat 12-mujor. Një pjesë kyçe e kërkesave ishin ndryshime kushtetuese për të garantuar barazi të plotë të të gjithë shtetasve shqiptarë para ligjit dhe miratimi i ndryshimeve me referendum popullor. Si pjesë e këtyre ndryshimeve kërkohej ndryshimi i Kodit Zgjedhor dhe i ligjit për financimin e partive politike dhe organizatave të ndryshme.
Protestuesit kërkuan gjithashtu kufizimin e ushtrimit të detyrës së Kryeministrit në jo më shumë se dy mandate, të plota ose të pjesshme, gjatë gjithë jetës politike të një individi. Në mënyrë paralel, ata kërkuan anulimin e ndryshimeve të bëra në ligjin për “Zonat e Mbrojtura” dhe në ligjin për “Trashëgiminë kulturore”, shfuqizimin e paketës ligjore të njohur si “Paketa e Maleve” dhe shfuqizimin e statusit dhe të kuadrit ligjor për “Investimet Strategjike”.
Në përfundim të kërkesave u theksua se kontrata e re sociale mes qytetarëve dhe shtetit do të përpilohet pas konsultimit me intelektualë, ekspertë teknikë dhe qytetarë apartiakë, të propozuar nga sheshi i protestës.
