Një letër satirike që pretendohet se i është lënë nga Donald Trump zëvendëspresidentit JD Vance në rast vdekjeje u bë virale në mediat amerikane pasi u publikua nga Daily Beast. Dokumenti u përmend fillimisht nga Sebastian Gorka, zyrtar i Shtëpisë së Bardhë dhe aleat i afërt i Trump, gjatë një interviste në podkastin “Pod Force One”. Sipas Gorkës, Trump i kishte lënë “udhëzime sekrete” Vance në rast se ai “vritej” gjatë kohës që ishte në detyrë; Gorka nuk dha detaje për përmbajtjen.
Daily Beast publikoi më pas tekstin e plotë të letrës, e cila është shkruar në stil ironik dhe me tone provokuese. Në të, Trump imagjinon vdekjen e tij dhe i jep udhëzime Vance për mënyrën si duhet të organizohet trashëgimia e tij politike dhe personale. Mes kërkesave të përmendura janë një “varr prej ari” në Palm Beach dhe ndërtimi i bibliotekës së tij presidenciale në Malin Rushmore, me kërkesën që fytyrat e presidentëve të tjerë të zëvendësohen nga katër versione të tij.
Teksti përfshin gjithashtu sulme ndaj NATO-s, Evropës, demokratëve dhe figurave të njohura publike, ndërsa Trump i kërkon Vance që të vazhdojë stilin e tij politik edhe “më çmendur”. Në disa pjesë letra bën shaka me familjen e tij, duke përmendur djemtë Donald Jr. dhe Eric si dhe djalin Barron. Përmban gjithashtu referenca për Melania Trump, funeralin e Jimmy Carter, Çmimin Nobel, teori konspirative dhe komente satirike për mediat amerikane.
Publikimi ka shkaktuar reagime të shumta në rrjetet sociale dhe në mediat amerikane; shumë komentues e përshkruajnë tekstin si një përzierje satire politike dhe humori absurd, ndërsa të tjerë e konsiderojnë atë një tjetër provokim të lidhur me figurën e Trump.
