Sezoni i ri i LaLigës 2026-27 nis më 15 gusht, por disa vendime të rëndësishme për edicionin e ardhshëm u morën kohët e fundit gjatë mbledhjeve në Spanjë të Komitetit Teknik të Arbitrave (CTA). Një nga vendimet kryesore është që futbolli spanjoll nuk do të aplikojë të ashtuquajturin “Ligji Vinicius”, rregull i diskutuar më parë që parashikonte ndëshkim me karton të kuq direkt për lojtarët që mbulojnë gojën gjatë debateve, për të shmangur fyerjet e mundshme. CTA ka vendosur të ndjekë linjën e UEFA-s dhe të mos e përfshijë këtë masë në kampionatin spanjoll, duke argumentuar se gjesti i mbulimit të gojës shpesh përdoret edhe për komunikime taktike apo diskutime pa përmbajtje fyese. Presidenti i CTA-së, Fran Soto, ka shprehur dyshime për këtë rregull, duke theksuar se nuk duhet të lihet një skuadër me 10 lojtarë pa prova të qarta për atë që është thënë.
Arbitrat spanjollë kanë kërkuar gjithashtu nga IFAB një masë të re kundër humbjes së kohës, veçanërisht nga portierët që ekzagjerojnë dëmtimet. Modeli i propozuar është i ngjashëm me atë që pritet në Premier League: nëse një portier simulon një dëmtim për të vonuar rifillimin e lojës, skuadra e tij mund të ndëshkohet duke luajtur për një minutë me një lojtar më pak në fushë. Qëllimi i kësaj mase është rritja e kohës efektive të lojës, përmirësimi i ritmit të ndeshjeve dhe i spektaklit.
Përveç kësaj, arbitrazhi spanjoll do të aplikojë disa udhëzime të testuara gjatë Kupës së Botës 2026: kontroll më i madh për vonesat në goditjet anësore; zëvendësimet duhet të kryhen brenda 10 sekondave; dhe futbollistët që marrin trajtim mjekësor duhet të qëndrojnë jashtë fushës për një minutë. Këto ndryshime janë pjesë e përpjekjeve të UEFA-s për të unifikuar zbatimin e rregullave në kampionatet evropiane. Sa i përket VAR-it, drejtimi mbetet i njëjtë: ndërhyrje vetëm për gabime të qarta dhe të dukshme, me teknologjinë si mbështetje për vendimet e arbitrit në situata të rëndësishme.
