Po mbahet për herë të parë Kuvendi Kombëtar i Protestës dhe gjatë zhvillimit të tij kanë shfaqur tensione midis pjesëmarrësve dhe organizatorëve. Disa nga të pranishmit kundërshtuan mënyrën e organizimit dhe përbërjen e mbledhjes, duke u ankuar për mungesën e pjesëmarrësve nga marshimi dhe për moshën e pranishmëve. “Mosha mesatare këtu është mbi 45 vjeç, këtu nuk shoh asnjë nga marshimi. Nuk jemi lajmëruar,” shprehet një protestues në prapaskenë.
Në sallë ishin edhe persona që kërkuan të flasin, por u ndaluan nga organizatorët. Njëri nga organizatorët deklaroi se ekziston një rend dite dhe se nuk do të lejohet që mbledhja të prishët nga ndërhyrjet e paplanifikuara: “Kemi një rend dite dhe nuk do të lejojmë të na prishni mbledhjen.” Moderatorja konfirmoi se kuvendi është i hapur për të gjithë qytetarët dhe se do të mbahet takim i hapur: “Ky kuvend është i hapur për të gjithë qytetarët, do të kemi takim të hapur.”
Gjatë debatit, një organizator i cili po përpiqej të futej në fjalim u përgjigj në mënyrë të ashpër ndaj atyre që e pengonin, duke thënë se kur ka pasur më parë turma ai nuk është trembur: “Nuk ma ka ndier kur kam pasur 300 veta përballë, jo më juve. Prandaj mos na sfidoni, mos na merrni neve sikur jemi të butë.” Fjalët e tij shkaktuan reagime të forta në sallë.
Një incident tjetër u regjistrua kur një qytetar kërkoi të ulej në rreshtin e parë dhe tre djem tentuan t’ia pengonin me forcë. Pavarësisht këmbënguljes së organizatorëve që të ketë rend në sallë, burri nuk u hoq nga karrigia e rreshtit të parë.
Pas qetësimit të tensioneve për momentin, një nga organizatorët theksoi nevojën për të pasur vazhdimësi dhe për të shkuar “përtej sheshit”: “Duhet të shkojmë përtej sheshit. Në shesh e vramë frikën, por çfarë do të bëhet më pas? Nuk duhet të përsërisim rastin e Serbisë, ku protestuan pa fund dhe nuk ndryshuan asgjë.”
