Kryeministri i Kosovës, Albin Kurti, u pyet për bashkëpunimin e ardhshëm midis ish-presidentes Vjosa Osmani dhe kryetarit të LDK-së, Lumir Abdixhiku, në zgjedhjet e qershorit. Gazetarët e pyetën konkretisht “Sa i rrezikshëm është binomi Osmani-Abdixhiku për Vetëvendosjen”. Përgjigjen e Kurti e lidhte me rezultatet e zgjedhjeve të 28 dhjetorit, duke përmendur përqindjen dhe numrin e deputetëve që mori Lëvizja Vetëvendosje.
Kurti tha se të gjithë që kanë ambicie politike dhe duan pushtet, si dhe ata që kanë vizion e ide për të mirën e qytetarëve, le të angazhohen dhe të punojnë me të gjitha fuqitë, duke u dëshiruar sukses. Ai nënvizoi se për vendimmarrjen nuk vendos asnjë kryetar partie apo pretendues për poste, por populli. Kurti rikujtoi se “para katër muajsh” populli ia dha Vetëvendosjes 51.1%, duke theksuar saktësisht shifrën: “Populli ia dha Vetëvendosjes 51.1%, jo 50%, 51. Jo 51, po 51.1%”.
Në të njëjtën kohë, kur u përmendën edhe “nëntë deputetë të komuniteteve joshumicë”, Kurti tha se njerëzit kanë dëshira, çka e cilësoi si normale, por shtoi se nuk duhet të ngatërrohen dëshirat me faktet, duke i drejtuar këtë vërejtje Osmanit e Abdixhikut.
I pyetur se si do të qëndrojë Vetëvendosje me përqindje pas zgjedhjeve të qershorit, Kurti u përgjigj se mbetet të shihet dhe aludoi se opozita e ka penguar lëvizjen. Ai tha se beson se qytetarët kanë kuptuar se sa herë përpiqesh t’ia vësh “digan një rrjedhje socio-historike e politike siç është Lëvizja Vetëvendosje” atëherë do të ketë gjithnjë e më shumë prurje. Sipas tij, kur atyre u kanë vënë diga, prurjet janë rritur, dhe se sa do të jetë rezultati do të bëhet i ditur në mbrëmjen e 7 qershorit. Top Channel.
