Të dhënat zyrtare të Prokurorisë së Përgjithshme tregojnë se gjatë një viti iu referuan dhomave penale në gjykata 961 të mitur me statusin e të pandehurit. Një ndër rastet e përmendura është ai i një gjimnazisteje, klientes së avokatit Lorenc Danaj, e cila kishte statusin si e akuzuar, ashtu edhe të viktimës. Ajo u përfshi në përleshje masive mes vajzash pas një mosmarrëveshjeje me bashkëmoshataret për simbolin e zemrës që kishte klikuar në Instagramin e të dashurit të njërës prej tyre.
Avokati Danaj tha se konflikti ishte lindur përmes Instagramit dhe kishte pasuar me veprime dhune të mëpasshme mes palëve: “Ka qenë i njëjti rast, konflikt i lindur përmes Instagramit, i cili ka pasuar me veprime dhune të mëpasshme me njëra-tjetrën. Nuk ka fokusuar në ndërgjegjësimin në gjykatë dhe situata ngelët shqetësuese për këto grupmosha”, tha ai. Gazetarja Anila Hoxha e pyeti nëse gjatë hetimeve apo më vonë kishin shprehur pendim; Danaj u shpreh: “Nuk pati asnjë moment me akulpa për asnjërën palë, edhe ky është problemi më shqetësues për këto raste.”
Për konfliktin që u kategorizua si dëmtime me dashje, pasi të dyja palët kishin dhunuar njëra-tjetrën, gjykata i ftoi për ndërmjetësim, por asnjëra prej tyre nuk pranoi. Sipas raportit, Qendra për Parandalimin e Krimeve tek të Miturit nënvizon se drejtësia vazhdimisht ka përdorur këshillimin. Avokati Danaj theksoi mungesën e një sistemi rehabilitimi në Shqipëri për këto raste, duke theksuar se kjo sjell mosedukim dhe mungesë riedukimi pas kundërvajtjes penale: “Ana tjetër e kësaj medaljeje është se në Shqipëri nuk ka një sistem rehabilitimi për këto raste, e cila pasohet edhe me mosedukimin, riedukimin e tyre pas kësaj kundërvajtjeje penale.”
Të dhënat shënojnë se në një vit drejtësia vendosi masën e shmangies për 521 të mitur, këshillim për 90 të tjerë, 408 paralajmërime me shkrim, ndërsa prokuroritë për 811 raste shpallën mosfillim të hetimeve.
