Me 11 vota, Komisioni Qendror i Zgjedhjeve (KQZ) në Kosovë certifikoi rezultatin e zgjedhjeve të parakohshme parlamentare të 28 dhjetorit. Sami Kurteshi nga Lëvizja Vetëvendosje, pas certifikimit, shprehu rezervat për Listën Serbe, të cilën e ka kundërshtuar më parë në KQZ. Rezultatet u miratuan pas përfundimit të afateve ankuese nga partitë, nga të cilat disa kanë drejtuar kërkesa në Panelin Zgjedhor dhe Gjykatën Supreme.
Procesi i certifikimit erdhi pas rinumërimit të plotë të votave për deputetë, dhe deri tani dhjetëra persona janë arrestuar për manipulim votash, ndërsa prokuroria ka paralajmëruar hetime edhe ndaj kandidatëve.
Sipas rezultateve përfundimtare, Lëvizja Vetëvendosje fitoi 51.10% të votave, duke siguruar 57 ulëse në Kuvend, ndjekur nga Partia Demokratike e Kosovës me 20.19%, Lidhja Demokratike e Kosovës me 13.24%, dhe Aleanca për Ardhmërinë e Kosovës me 5.50%. Lista Serbe fitoi nëntë ulëse nga ato të rezervuara për minoritetin serb.
Pas certifikimit, hapi i ardhshëm është mbajtja e seancës konstituive, që duhet të mbahet brenda 30 ditëve dhe të thirret nga presidentja Vjosa Osmani. Në rast se ajo nuk e bëhet, Kuvendi mund të mblidhet automatikisht. Kryetari i legjislaturës paraprake, Dimal Basha, është përgjegjës për përgatitjen e rendit të ditës dhe vendosjen e deputetëve në Kuvend.
Seanca konstituive do të ketë katër pika të rendit të ditës: formimin e Komisionit të Përkohshëm për Verifikimin e Kuorumit dhe Mandateve, betimin e deputetëve, zgjedhjen e kryetarit dhe nënkryetarëve të Kuvendit.
Pas përfundimit të konstituimit, presidentja do të mandatojë një kandidat për kryeministër, zakonisht nga partia fituese. Kurti ka shprehur besimin se do të arrijë lehtësisht numrat për të formuar qeverinë, pas fitimit të 57 ulëseve.
Sa i përket presidencës, afati i fundit për zgjedhjen e presidentit është 4 marsi. Vetë Osmani ka shprehur dëshirën për një mandat të ri, por nuk është e sigurt nëse do të mbledhë mbështetje të mjaftueshme.
Në rast të dështimit në zgjedhjen e presidentit, mund të shpallen zgjedhje të reja brenda 45 ditëve.
