Raporti vjetor i Komisionit Europian për gjendjen e shtetit të së drejtës në Shqipëri konstaton se, megjithëse gjyqësori konsiderohet i qëndrueshëm pas Reformës në Drejtësi, kanë vazhduar përpjekjet për ndikim të padrejtë në institucionet e drejtësisë. Dokumenti përmend sulme personale ndaj magjistratëve, përfshirë ato kundër Strukturës së Posaçme kundër Korrupsionit dhe Krimit të Organizuar (SPAK). Tetë magjistratë—dy gjyqtarë dhe gjashtë prokurorë, mes tyre prokurorë të SPAK dhe ish-kreu i KLP-së—janë vendosur nën mbrojtje.
Raporti shpjegon se zyrtarë publikë dhe politikanë, edhe në nivele të larta, vazhduan të përpiqen të ushtrojnë ndikim publik të padrejtë ndaj institucioneve të drejtësisë dhe të kryenin sulme personale ndaj magjistratëve në të gjitha nivelet gjatë periudhës së raportimit. Si shembull përmendet pezullimi nga detyra i një zyrtari të nivelit të lartë, i urdhëruar nga Gjykata e SPAK-ut në përputhje me Kodin e Procedurës Penale, dhe kërkesa e SPAK-ut për heqjen e imunitetit parlamentar të tij, veprime që shkaktuan reagime të konsiderueshme negative nga degët ekzekutive dhe legjislative, përfshirë sulme të drejtpërdrejta ndaj SPAK-ut dhe institucioneve gjyqësore. Institucionet udhëheqëse të gjyqësorit lëshuan deklarata publike duke denoncuar presionin politik.
Raporti evidenton gjithashtu mangësi në aksesin në drejtësi, përfshirë problemet me ndihmën ligjore, infrastrukturën dhe sigurinë e gjykatave. Ndërsa korniza institucionale për parandalimin e korrupsionit është përmirësuar, mbetet i dobët koordinimi me zbatimin e ligjit. Rreziqet e korrupsionit raportohen të përhapura në Policinë e Shtetit, prokurimin publik dhe sektorë me rrezik të lartë, për të cilët po zhvillohen aktualisht vlerësime të riskut.
Duke iu referuar procesit të vettingut, raporti nënvizon se janë shkarkuar 456 gjyqtarë e prokurorë, ndërsa 348 janë konfirmuar — përkatësisht 43 për qind e rasteve të kontrolluara.
