Aktori Noah Wyle, 55 vjeç, është shpallur “Mashkulli më seksi në botë” nga revista amerikane People, pas suksesit të tij në serialin “The Pitt” në HBO Max. Lajmin e mori i papërgatitur dhe, siç tha në intervistë për People, “Mendova se tingëllonte si një shaka. As në një milion vjet nuk do ta kisha menduar se ky nder do të më jepej mua”. Ai shtoi me humor se shpresonte që titulli t’ia ndryshonte jetën, por pranoi se miqtë dhe familjarët do ta ngacmojnë për këtë vlerësim.
Edhe pse i gëzuar, Wyle tha se nuk ndihet plotësisht i sigurt me veten dhe i vështirë për t’u shfaqur në qendër të vëmendjes pa u fshehur pas një personazhi. Ai theksoi: “Shpresoja që sot të ishte dita kur do të mund të thosha: ‘Shikoje veten, je mashkulli më seksi në botë. Më në fund mund të ndihesh rehat me veten’. Por ende jo.”
Bashkëshortja e tij, Sara Wells, me të cilën është martuar që nga viti 2014, ndihmoi që ai ta pranonte vlerësimin; sipas aktorit, ajo e përshkoi çmimin si reflektim të shijes së saj dhe të cilësive të tij si bashkëshort dhe baba. Çifti ka një vajzë, Frances, lindur në 2015. Wyle ka edhe dy fëmijë nga martesa e parë me Tracy: djalin Owen (2002) dhe vajzën Auden (2005). Ai tregoi se fëmijët reaguan ndryshe: djali e përshkroi me pragmatizëm dhe e përgëzoi, ndërsa vajza më e madhe mbeti e habitur dhe, sipas tij, do ta ngacmojë për dekada.
Wyle përmendi ish-kolegun e tij nga seriali ER, George Clooney, dy herë fitues i këtij titulli (1997 dhe 2006), dhe shprehu shpresën që Clooney ta priste lajmin me humor dhe të ndihej krenar për të. Noah Wyle u bë i njohur për rolin e doktor John Carter në ER; u largua nga seriali në maj të 2005, në fund të sezonit të 11-të, pas lindjes së djalit, duke thënë se atësia ishte ngjarja që i ndryshoi më shumë jetën dhe ndikoi në vendimin për t’u larguar.
Titulli nga People jepet që prej 1985, me fituesin e parë Mel Gibson, ndërkohë që emra të tjerë që e kanë marrë përfshijnë John Krasinski, Paul Rudd, Johnny Depp, Sean Connery dhe Denzel Washington. Brad Pitt është fitues dy herë (1995, 2000). Për Wyle, ky çmim shkon pas suksesit të “The Pitt” dhe i jep një dimension të ri karrierës së tij në televizion dhe Hollywood.
