Anthony Gordon ka mbërritur në Barcelonë për të finalizuar transferimin e tij në “Camp Nou”, transferim i parë i klubit katalanas për sezonin 2026-2027. Ai zbriti në aeroportin El Prat dhe më pas u drejtua në Spitalin e Barcelonës për ekzaminimin mjekësor, të planifikuar për orën 16:00. Me mbërritjen në terminalin privat, lojtari iu afrua gazetarëve për t’i përshëndetur nga distanca dhe u shpreh: “Jam shumë i lumtur”.
Gordon udhëtoi me një fluturim privat së bashku me agjentin e tij, Adam Dugdale. Fluturimi pësoi një vonesë prej një ore e gjysmë, çka ndikoi në axhendën e tij. Me miratimin mjekësor, Barça pritet të finalizojë transferimin me Newcastle. Marrëveshja midis klubeve parashikon 70 milionë euro dhe 10 milionë euro të tjera si bonuse, të lidhura me performancën dhe titujt e fituar. Lojtari do të nënshkruajë një kontratë pesëvjeçare.
Gordon është përshkruar si një nga sensacionet e sezonit dhe një nga të preferuarit e trajnerit Hansi Flick. Pas përfundimit të procedurave të nënshkrimit, ai do të kthehet menjëherë në Angli për t’u bashkuar me ekipin kombëtar, ku pritet të konkurrojë me Marcus Rashford për një vend titullar. Megjithëse do të firmosë kontratën para, prezantimi zyrtar i tij si futbollist i Barcelonës nuk do të bëhet deri pas përfundimit të Kupës së Botës.
Përpara mbërritjes së tij, drejtori sportiv i Barcelonës, Deco, dhe koordinatori teknik Bojan zhvilluan një takim në Angli disa ditë më parë me agjentit dhe vetë lojtarin. Qëllimi i takimit ishte finalizimi i detajeve të kohëzgjatjes së kontratës dhe pagës së lojtarit. Lajmi është publikuar nga Top Channel.
