Aktori Kliti Roshi përkujton babanë e tij, Artistin e Popullit Kadri Roshi, dhe hodhi akuza ndaj ish-drejtorit të Spitalit Ushtarak, të asaj kohe, që sipas tij u bë shkaktar për vdekjen e të atit. Ai tha se Kadri Roshi u operua në Greqi dhe jetoi gati tre vite pas operacionit, por se ditët e fundit pësoi trajtim të gabuar në spitalin ku ishte i shtruar.
Roshi i drejtoi fjalë të forta personit që ai e quan përgjegjës, duke e ftuar të dilte para dhe të pranonte përgjegjësinë: “Ditët e fundit, do ta quaja me gojën plot, nëse ka këllqe personi, ai e di shumë mirë për kë po flas të vijë ai personi… Atë e vrau, me gojën plot, një person i vetëm. Ai e di shumë mirë.” Sipas tij, personi në fjalë ka qenë drejtues i Spitalit Ushtarak në kohën kur Kadri Roshi ishte i shtruar, dhe përkujdesja për të ishte bërë “nëpërmjet interesit”, si nga presidenti i asaj kohe Alfred Moisiu, ashtu edhe nga kryeministri Fatos Nano.
Kliti Roshi thotë se ishte lënë urdhër për ndjekje të rreptë dhe për të treguar me gisht përgjegjësitë: “Iu la porosi që do të ndjekësh hap pas hapi, me gishtin tregues drejt tij, pra që ke përgjegjësi direkte ti për atë.” Ai përshkroi dëmtime të rënda që sipas tij pasuan nga trajtimi: Kadri Roshi përfundoi me dëmtim të rëndë të veshit të mesit dhe humbje ekuilibri, si rezultat, sipas Klitit, i 24 flakon-streptomicinës.
Në akuzat e tij ai pyet retorikisht se çfarë është bërë nga personi i ngarkuar për kujdesin, duke thënë se i ishte bërë “jashtëzakonisht mjekim i gabuar, vdekjeprurës”. “24 flakonë, a je në binarë apo jo. Kjo e vrau, në kuptimin fizik, ai nuk lëvizte dot. Ishte i vdekur, i mbaruar, edhe në tualet donte shoqërues, nuk kishte ekuilibër,” deklaroi Kliti Roshi.
Materiali i deklaratave përfshin një regjistrim video të publikuar nga Top Channel.
